Diskurso di Gezaghèber Rijna 12 di mei 2020
Awe 12 di mei ta dia internashonal di enfermeria. Tur aña di nobo riba kumpleaño di Florence Nightingale ta duna honor na esunnan ku ta traha den sektor di kuido. Naturalmente meskos ku vários selebrashon i evenementu ku a tuma lugá den e simannan tras di lomba, selebrashon di dia internashonal di enfermeria di e aña aki tin un toke diferente dor di e impakto di corona.
Mi ke hasi uso di e oportunidat aki pa felisitá tur hende ku traha den sektor di kuido riba boso dia speshal.
Sigui ku e bon trabou.
Pa loke ta trata e sifranan di awe, nos no tin niun kaso aktivo di corona. A tèst total 291 te ainda pa e vírùs, di kua 31 a tèst via di e COVID drive thru siman pasá djamars i djaweps. Te ku awe tin 90 persona den karentena.
Aki ratu Christopher Frans, komo kordinadó di e grupo di trabou di reparashon ta bai duna e último informashonnan riba e progreso pa trese nos residentenan ku ta den eksterior, Boneiru bek.
Manera por a tuma nota mas i mas nos ta bai habriendo nos fronteranan ku e koutela nesesario.
Por último awe di forma ofisial mi a risibí e grato notisia ku mi a keda nombra komo gezaghebber pa un periodo mas.
Pa ami ta un gran plaser i honor pa sirbi mi pueblo komo boso gezaghèber. Di forma humilde mi ta gradesido pa e e konfiansa ku su mahestat Rei Willem Alexander i Ministerio di BZK ta pone den mi persona pa bolbe nombra mi komo gezaghèber pa e próksimo 6 añanan aki.
Ku entusiasmo i determinashon mi ta komprometé mi mes pa hasi tur loke ta na mi alkanse pa sirbi mi isla mas mihó posibel.
Nos ta na komienso di un kapítulo nobo di nos historia mundial den tur sentido di palabra i mi ta orguyoso di por ta forma parti di e proseso aki komo boso sirbidó.