Poblashon Hulanda Karibense a krese den 2019 ku mas di 800
Riba 1 di yanüari 2020 Hulanda Karibense tabatin kasi 26 mil habitante, 830 mas ku un aña anterior. E oumentu aki ta práktikamente den su totalidat pa kuenta di Boneiru. Na Saba i Sint Eustatius e poblashon no òf apénas a krese. Tin mas hende for di otro pais a establesé nan mes na Hulanda Karibense ku a sali. Kresementu natural a hunga un papel modesto den e kresementu di poblashon. Asina CBS ta informá a base di sifranan di poblashon nobo tokante Hulanda Karibense.
Kasi 9 di 10 habitante nobo na Boneiru ta migrante
Riba 1 di yanüari 2020 Boneiru tabatin 20,9 mil habitante, un oumento di 811 persona (4 porshento) kompará ku un aña anterior. Por atribuí e kresementu aki pa gran parti (pa 87 porshento) na un saldo di migrashon positivo: mas hende a establesé nan mes for di un otro pais na Boneiru (kasi 1,5 mil) ku tin ku a bai (770). E saldo di nasementu tabata 106: 203 nasementu, i 97 kaso di fayesimentu. Ku esaki e kresementu natural a kontribuí ku 13 porshento na kresementu di e poblashon riba e isla aki.
Pa saldo, mayoria migrante tabata prosedente di Kòrsou, siguí na basta distansia pa Repúblika Dominicano, Venezuela, Perú, Hulanda (Oropeo) i Merka. E kantidat di persona ku a kambia Kòrsou pa Boneiru, tabata muchu mas haltu den 2019 mas ku un aña anterior. Tambe mas hende di Repúblika Dominicano a bin Boneiru. Migrashon for di Venezuela pa Boneiru al kontrario a baha. For di komienso di 2019 no ta posibel mas pa muda di Venezuela direktamente pa Boneiru.
Miéntras ku den 2018 na final mas hende a bai Hulanda for di Boneiru ku vise versa, esaki a kambia den 2019 den un surplus di hulandesnan oropeo ku a bin establesé na Boneiru.
Kantidat di habitante Sint Eustatius ta keda igual
E kantidat di habitante di Sint Eustatius riba 1 di yanüari 2020, ku 3,1 mil, tabata kasi igual na e kantidat un aña anterior. Ku 30 nasementu i 15 fayesimentu tabatin un kresementu natural leve di e poblashon. E saldo di migrashon tabata negativo: 201 migrante nobo a establesé nan mes na Sint Eustatius, miéntras ku 215 persona a bandoná e isla den 2019.
Mas hende a bin Sint Eustatius for di Repúblika Dominicano i Colombia den 2019 ku vise versa. Esei ta konta tambe pa Hulanda (Oropeo) Nederland, miéntras ku den 2018 pa saldo al kontrario mas habitante for di Sint Eustatius a bai Hulanda. Na Sint Eustatius na 2018 a hasi korekshonan na e registro sivil, di manera ku e tempu ei a ahustá e kantidat di habitante na un kantidat mas abou. Na 2019 no a tuma lugá korekshonan di e registro sivil. Mas aleu ta hala atenshon ku e kantidat di personanan ku a muda den Sint Eustatius den 2019 a bira dos biaha mas tantu. Esaki ta relashoná ku kontròlnan ku a tuma lugá, kaminda a bishitá e adrèsnan pa kontrolá ken realmente ta biba einan. Esaki a kondusí na korekshon i mehorashon di e registro sivil.
Oumento leve di migrashon na Saba
Na komienso di 2020 Saba tabatin 1,9 mil habitante, 18 mas ku un aña anterior (kresementu di 1 porshento). E saldo di nasementu tabata negativo, ku 11 nasementu i 13 fayesimentu. E kresementu di poblashon leve tabata pa motibu di un saldo di migrashon positivo (20), partikularmente pa motibu ku na final ta resultá ku un poko mas hende for di Merka i Repúblika Dominicano a establesé na Saba. Al kontrario mas hende a bai Hulanda Oropeo for di Saba ku a bin di direkshon kontrario.
Den 2018 e kantidat di habitante di Saba a baha pa motibu di korekshon di e registro sivil. Durante e korekshon aki a saka personanan ku tabata inskribí ainda, pero ku en realidat entretantu a bandoná e isla, for di e registro sivil. Esaki a kondusí den 2018 na un redukshon di e kantidat di personanan prosedente di Merka i Canada, inskribí na Saba.
Den 2019 no a tuma lugá un korekshon di e registro sivil.
Fuentenan
StatLine - Stand van de bevolking
http://opendata.cbs.nl/statline/#/CBS/nl/dataset/83698NED/table?ts=1588152777610
StatLine - Bevolkingsontwikkeling
http://opendata.cbs.nl/statline/#/CBS/nl/dataset/83774NED/table?ts=1588152691884