Kompensashon for di EZK awor tambe pa empresario ku gastu fiho mas abou
Empresarionan afektá pa e medidanan en konekshon ku e vírùs di corona por apliká pa un kompensashon pa nan gastunan fiho for di 23 di aprel último. Un kondishon pa risibí e pago di un solo bia di 4400 dòler ta ku e empresario mester tin mínimalmente 4400 dòler na gastu fiho den e periodo di 13 di mart 2020 te ku 12 di yüni 2020. Komo ku hopi kompania na Hulanda Karibense no tin gastu fiho asina haltu pero si mester di ayudo, Ministerio di Asuntunan Ekonómiko i Klima (EZK) a ekspandé e kompensashon.
Kompanianan ku den e periodo di 13 di mart 2020 te ku 12 di yüni 2020 tin 2200 dòler na gastu fiho miéntras nan tin mínimalmente 2200 dòler na pèrdida di entrada en konekshon ku e vírùs di corona, den e variante nobo por bini na remarke pa un kompensashon di 2200 dòler pagá un solo bia. Entrante awe por apliká pa esaki.
A tuma ofer e montante original for di Hulanda Oropeo kaminda empresarionan den sierto sektor por a risibí pago di un solo bia di 4000 Euro ku gastunan fiho di 4000 Euro. E otro banda di e punto di salida di igualdat aki ta ku hopi empresario chikí na Hulanda Karibense no por a bini na remarke pa e kompensashon. A establesé e variante nobo riba konseho di Kámaranan di Komersio di Boneiru, Saba i Sint Eustatius.
Kondishonnan pa bini na remarke pa e variante nobo ta igual ku pa e variante original. E kompania pues mester tabata konosí na Belastingdienst Hulanda Karibense riba 13 di mart 2020 i establesé na Boneiru, Saba òf Sint Eustatius
Komo ku Ministerio di EZK no tin instansia ehekutivo na Hulanda Karibense, unidat SZW di RCN ta ehekutá e areglo aki. E kondishonnan i formularionan di aplikashon pa e kompensashon ta disponibel riba www.rijksdienstcn.com/covid-19 (bou di Pakete di emergensia di Gobièrnu). Por entregá formularionan kompletamente yená i firmá te ku mas tardá 12 di yüli 2020 via di e e-mail tegemoetkomingEZK@rijksdienstcn.com.
Pa ayudo ku aplikashon por tuma kontakto ku Kámara di Komersio via steunloket@kvkbonaire.com. Pa pregunta urgente por tuma kontakto ku unidat SZW di RCN via 781-5558 (Boneiru) òf 319 5693 (Sint Eustatius i Saba).