Kòrsou ganadó Festival di Pelíkula di Derechi di Mucha di UNICEF Karibe 2020

Djasabra 21 di novèmber tabata e dia. E final di e di dos edishon di e Festival di Pelíkula di Derechi di Mucha di UNICEF Karibe 2020. E biaha aki Boneiru tabata e isla organisadó, pero pa motibu di coronavirus a tuma e desishon pa no risibí e muchanan di e islanan ku ta partisipá físikamente na Boneiru. Komo alternativa a organisá un programa di televishon bibu for di Hulanda, presentá dor di Lisette Wellens.

Unicef Kinderrechten Filmfestival

E partisipantenan di Boneiru, Kòrsou, Aruba, Saba, Sint Maarten tabata virtualmente presente. Sint Eustatius a djòin mas despues. Kada isla a sòru pa un lokalidat festivo. Durante di un ora i mei a transmití tur pelíkula di e muchanan. Tantu e pelíkulanan kòrtiku tokante derechi di mucha a base di un teksto di Saba, Boneiru, Kòrsou, Aruba i Sint Eustatius i tambe, spesial pa e edishon aki, e pelíkulanan di Sint Maarten i Sint Eustatius kaminda e muchanan ta splika nan pintura tokante derechi di mucha. Mas e tempu a pasa, mas tenshon tabatin. Ken e hurado lo skohe komo ganadó? Al fin diputado Nina den Heyer a duna nos e kontesta ku nos tabata warda riba dje for di Boneiru. A resultá ku e mihó pelíkula di derechi di mucha a sali pa skol Emmanuel na Kòrsou. E pelíkula ta bai tokante e importansia di famia pa mucha i spesialmente e importansia pa muchanan tene kontakto ku tur dos mayor. E muchanan a haña guia ku e produkshon di nan pelíkula dor di nan ‘filmcoach’ Ralph Durgaram.

Banda di un premio pa mihó pelíkula tabatin premio pa e pelíkulanan tokante derechi di mucha den e siguiente kategorianan:

  • Premio pa mihó aktuashon tambe a bai pa skol Emmanuel di Kòrsou.
  • Premio pa e mihó storia di derechi di mucha a bai pa skol Makuarima na Aruba.

Tambe tabatin premio pa e pelíkulanan tokante e pintura di derechi di mucha den e siguiente kategorianan:

  • Premio pa mihó pintura di derechi di mucha a bai pa Canadian International Academy na Sint Maarten
  • Premio pa mihó argumentonan tokante derechi di mucha a bai na Golden Rock School na Sint Eustatius.

Despues ku transmishon di e programa a terminá tabatin un ‘afterparty’ na tur e islanan. Asina e final di 2020 a terminá. Duna atenshon na derechi di mucha ta keda sumamente importante. No tur mucha riba e islanan konosé nan derechi. Solamente ora e muchanan ta na altura di nan derechi nan por defendé nan mes. Dor di organisá e Festival di Pelíkula di Derechi di Mucha di UNICEF, ta usa un manera kreativo pa duna atenshon na derechi di mucha.

Por wak e pelíkulanan ganadó riba e página di Facebook di e Festival di Pelíkula di Derechi di Mucha di UNICEF: https://www.facebook.com/unicefdutchcaribbean