Mantenshon di ILT na BOPEC (5)

Notisia | 26-08-2020 | 21:33

Inspekshon di ambiente di bida i transporte (ILT - Inspectie Leefomgeving en Transport) ta apliká e asina yamá –‘last onder bestuursdwang’ (LOB) na e terminal petrolero di BOPEC na Boneiru.

Algun tanki i tuberia di e empresa mester bira bashí den término kòrtiku komo ku esaki ta oumentá riesgo di ‘lekkage’. A resultá ku BOPEC no tin e kapasidat pa eliminá e riesgonan di seguridat presente. ILT ta konsiderá esaki inakseptabel i ta bai tuma e medidanan nesesario pa eliminá e riesgonan pa persona i medio ambiente. Lo rekuperá e kostonan mas despues serka BOPEC.

Durante e inspekshonnan na final di 2019 ku ILT, Rijkswaterstraat, Inspectie SZW i brantwer a hasi, a sali na kla ku e proyektonan nesesario pa mehorashon a para pa falta di sèn di e kompania madre Venezolano. Na aprel 2020 e siguiente inspekshon mester a tuma lugá, pero pa motibu di corona mester a anulá e inspekshonnan aki. Ku tempu, e situashon na e empresa a empeorá. Ainda tin sinku tanki yená ku ‘fuel oil’, pero debí na e mal estado di e pirnan, e barkunan no por karga ni deskargá kombustibel na BOPEC. E kompania a informá fin di yüli ku e dak di e tanki mas grandi tin ‘lekkage’. Komo resultado, ora awa yobe, awa ta yena i lèk paden ku konsekuensia ku esaki por kai den otro. Ku e dak kai aden, e por kousa daño na e muraya paden di e tanki, kual despues e kontenido por basha afó.

ILT ta di opinion ku e tanki aki i e otro kuater tankinan mester bira bashi mas pronto posibel. Pa hasi esaki, mester inspekshoná i tèst dos otro tanki ku a renobá resientemente. Ku a aplikashon di e ’last onder bestuursdwang’, ILT ta tuma e asuntu den man i lo kordiná e inspekshon i tèst di e tankinan renobá. Lo diskutí e akshonnan nesesario adelantá ku BOPEC pa utilisá nan konosementu i eksperensia mas tantu posibel.