Minister Arie Slob ta sera konosí ku sektor di enseñansa na Hulanda Karibense
Minister di Edukashon Primario i Sekundario & Media, Arie Slob, lo hiba bishita di trabou na Hulanda Karibense di djaluna 13 te ku djárason 15 di yanüari.
Durante e dianan aki e lo sera konosí ku sektor di enseñansa lokal. Despues di yegada na St. Maarten riba djadumingu anochi 12 di yanüari, e minister lo bishita Saba, St. Eustatius i Boneiru susesivamente. Riba tur tres isla Minister Slob lo bishitá institushonnan edukativo di enseñansa primario i sekundario, kaminda e lo hiba kombersashon ku studiantenan.
Na Saba gezaghèber Jonathan Johnson i sekretario Tim Muller lo risibí minister. Den konteksto di e programa BES(t) 4 Kids, pa fortalesé akohida pre- i póseskolar, tambe minister lo bishita un akohida pa mucha riba kada isla. Na Saba tambe lo e bishita Expertise Center Education Care (EC 2) i biblioteka nashonal Queen Wilhelmina. Pa konkluí e bishita na Saba, lo subi Mount Scenery, ku su haltura di 887 meter e seru mas haltu den reino.
Riba djamars minister Slob lo bishitá St. Eustatius. Apesar di un reunion ku komisario di gobièrnu sentral Marcolino Franco i komisario suplente Mervyn Stegers, minister lo bishitá sinku skol, e museo di Historical Foundation i e históriko Fort Oranje (1636). Na final di e dia aki, e delegashon ta biaha pa Boneiru, kaminda gezaghèber Edison Rijna i Representante di Reino suplente Jan Helmand lo risibí nan.
Na Boneiru tambe minister lo bishita un kantidat di skol i hiba kombersashon ku studiantenan. Na Scholengemeenschap Bonaire (SGB) minister Slob i diputado Den Heyer lo firma tambe un di dos akuerdo pa edifisionan eskolar na Boneiru (‘Onderwijshuisvesting Bonaire’). E trayekto pa mehora alohamentu edukativo na Hulanda Karibense ta kana for di 2012 i ta finansiá pa ministerio di OCW i e tres entidatnan públiko.