Promé bibienda sosial di e akuerdo intergubernamental entregá
Minister Raymond knops di Asuntunan Interno i Relashon den Reino, a asistí awe na entrega di e promé bibienda sosial na Nieuw-Amsterdam. Ku esaki a hasi un komienso pa yega na un solushon pa e eskases di bibienda sosial na Boneiru.
Minister Knops: “E promé bibienda aki ta e resultado visibel di un bon koperashon riba e isla, kaminda a pone e base pa mas desaroyo sosioekonómiko.”
Na Boneiru tin un eskases grandi di bibienda sosial. P’esei den e akuerdo intergubernamental i e kombenio di bibienda (Convenant Volkshuisvesting) a hasi palabrashon tokante di konstrukshon di en total 500 bibienda sosial nobo. E bibienda ku a entregá awe ta forma parti di e promé tranche di 76 bibienda sosial ku ta konstruí den kolaborashon ku Entidat Públiko Boneiru (OLB), Fundashon Cas Boneriano (FCB) i Reino.
Gabinete a pone 2,5 mion euro disponibel pa e infrastruktura nesesario rondó di e bibiendanan. Ta komplementá e suma aki ku fondonan di infrastruktura di Entidat Públiko Boneiru. Minister Knops: “Mi ta spera un pronto entrega di e otro 424 kasnan den e añanan binidero. E bibiendanan aki ta un gran paso pa dilanti pa e habitantenan ku un pòtmòni chikitu.”
Minister Knops e siman aki ta bishitá e islanan ABC. Ademas di e entrega di e promé bibienda sosial, e tabatin kombersashonnan ku kolegio ehekutivo i konseho insular awe mainta. Awe nochi e ta sigui pa Kòrsou pa e último parti di su biahe.