SDA School Sint Eustatius kontentu ku alohamentu renobá

Djadumingu último Seventh Day Adventist School (SDA) na Sint Eustatius a organisá un enkuentro festivo relashoná ku inougurashon di e edifisionan renobá di e skol.

Opening SDA school Statia

Alumno di grupo 8 Gerene Joseph i Direktor di enseñansa di SDA, Syesha Pemberton ta kòrta e sinta, asistí pa Pastor Earl Esdaile di e misa di SDK Sint Eustatius.

Kulminashon di e enkuentro aki ta kòrtamentu di e sinta di apertura dor di Gerene Joseph (Direktor di enseñansa SDA pa region Norte di Karibe) i alumno di grupo 8 Syesha Pemberton. Esaki a sosodé den presensia di komisario suplente Mervyn Stegers, stakeholders di enseñansa lokal i vários dignatario di e organisashon regional di SDA.

Komo ku e skol a krese konsiderablemente, a konstruí un área nobo ku kuater lokal di lès na man robes di e tereno. A renobá e edifisionan eskolar bieu radikalmente: e konstrukshonnan por wanta teremoto i orkan i a remplasá dak, muraya, kozein i plafòn. Ademas a renobá fasilidatnan sanitario i mosaiko. Parti dilanti a instalá hèki nobo i tantu e espasionan nobo komo esnan renobá, a risibí instalashon nobo di fèn i èrko ku meter di CO2.
 
“E skol aki ta un ehèmpel pa kon segun iglesia di SDA, un skol mester ta”, segun dr. Gandalai Samlalsingh (direktor di SDA Stewardship pa region Norte di Karibe) durante su diskurso. Na nòmber di e organisashon di SDA, el a ekspresá su gratitut na gobièrnu Hulandes i lokal pa mehorashon di e alohamentu eskolar.

Komisario Suplente Mervyn Stegers durante su diskurso a sorprendé esnan presente ku e anunsio ku e Ministerio di Enseñansa, Kultura i Siensia (OCW) lo finansiá tambe un ‘upgrade’ di e tereno pafó. Lo enduresé e tereno, ta bini un sistema pa drenahe di awa di yobida, i ta instalá un dak chikí. 

Empresarionan prinsipalmente di Sint Eustatius a traha riba e proyekto di SDA School. E kontratista D&M Enterprises N.V. a ehekutá e proyekto, basá riba un diseño di Pream Architecten (Sint Maarten), bou di supervishon di De Jong Construction. E instalashonnan tékniko ta diseñá i realisá pa respektivamente CECC N.V. i Howard’s Enterprises N.V.
 
E proyekto di konstrukshon nobo i di renobashon di SDA School ta parti di un programa di akohida pa enseñansa ku a start na 2012 pa Boneiru, Saba i Sint Eustatius. E programa aki ta finansiá pa ministerio di OCW i e entidatnan públiko.