Komisario nobo di gobièrnu sentral i su remplasante pa Sint Eustatius

Awe djabièrnè, riba nominashon di  Minister Knops, Konseho di Minister na Den Haag a aprobá nombramentu di un Komisario nobo di Gobièrnu Sentral pa Sint Eustatius i su remplasante: respektivamente señor Marnix van Rij i su remplasante señora Alida Francis.

Komisario nobo di gobièrnu sentral Sint Eustatius

Entrante 15 di febrüari señor Van Rij i señora Francis ta tuma tareanan di e aktual Komisario di Gobièrnu Sentral señor Marcolino “Mike” Franco i su remplasante Mervyn Stegers over. Marcolino Franco i Mervyn Stegers durante e último dos añanan aki a trese vários partido huntu riba diferente tereno pa traha huntu riba mehorashon struktural na Sint Eustatius. Minister Knops ta gradisí tantu Franco komo Stegers pa nan esfuersonan hasí e último dos añanan tras di lomba.  

E Komisario nobo di Gobièrnu Sentral, Marnix van Rij tabata miembro di Senado (Eerste Kamer) for di 9 di yüni 2015 te 4 di yüni 2019. Te ku medio 2019 e tabata partner na Ernst & Young komo konsehero di impuesto i den su último funshon e tabata konsehero stratégiko pa Hulanda Karibense pa e Ministerio di Asuntu Interno i Relashon den Reino.  

E Komisario di Gobièrnu Sentral remplasante, señora Alida Francis, ta nasé i lantá na Sint Eustatius. E tin mas ku 30 aña ta traha den region di Karibe i su último funshon tabata na e servisio di komunikashon di RCN. Tambe el a duna un aporte grandi na rekonstrukshon di Sint Eustatius despues di orkan Irma.