Sint Eustatius ta drenta fase nobo atministrativo preparando pa elekshon
Entrante 15 di febrüari tantu sr. Marcolino Franco komo sr. Mervyn Stegers ta terminá nan periodo komo respektivamente Komisario di Gobièrnu Sentral i Komisario suplente di Gobièrnu Sentral. Riba e fecha ariba menshoná lo kuminsá un fase atministrativo nobo kaminda e enfoke prinsipal lo ta preparashon pa elekshon di Konseho Insular 2020. Señor Marnix van Rij ku ta apuntá komo Komisario di Gobièrnu Sentral nobo dor di Konseho di Minister lo guia e fase aki huntu ku Komisario di Gobièrnu Sentral remplasante sra. Alida Francis.
A apuntá señores Mike Franco i Mervyn Stegers dos aña pasá na momentu ku pa medio di un lei temporal relashoná ku negligensia di tarea na Sint Eustatius (Tijdelijke Wet Taakverwaarlozing Sint Eustatius) a drenta na vigor riba 6 di febrüari, 2018 i a resultá den intervenshon atministrativo di Gobièrnu di Reino. E promé fase tabata enfoká riba rekonstruí e infrastruktura di e isla i reorganisá su aparato públiko. “Statia ta riba e bon kaminda. Kasi tur proyekto di infrastruktura i organisatorio ta den fase di implementashon òf lo finalisá na 2020”, Franco ta splika.
Franco i Stegers ta di opinion ku a logra hopi pero ta rekonosé ku ainda tin hopi mas pa hasi. “Ta enkurashá empleadonan públiko i komunidat kompleto pa sigui traha huntu pa sigui dal e pasonan dilanti ku ta hopi importante pa desaroyo di Statia.”, segun Stegers. Pa garantisá un bon traspaso di e proseso, Franco i Stegers huntu ku e direktornan i mènedjernan di unidat di Entidat Públiko di Sint Eustatius lo sigui traha huntu pa garantisá un bon transferensia di e tareanan ku ya a inisiá ku n’e i ku ta kasi kla.
Señor Marnix van Rij i sra. Alida Francis lo tuma e tareanan over ofisialmente dia 15 di febrüari 2020. Señor van Rij tabata miembro di Senado (Eerste Kamer) di yüni 2015 te ku yüni 2019 i tabata partner na Ernst & Young te ku yüli 2019. Na e momentunan aki e ta konsehero stratégiko di Ministerio di Asuntunan Interior i Relashon den Reino na Boneiru.
E Komisario di Gobièrnu Sentral remplasante, señora Alida Francis, ta nasé i lantá na Sint Eustatius. E tin mas ku 30 aña ta traha den region di Karibe i su último funshon tabata na e servisio di komunikashon di RCN. Tambe el a duna un aporte grandi na rekonstrukshon di Sint Eustatius despues di orkan Irma.