Koperashon BKCN i BOGO prolongá ku dos aña
Riba 28 di yanüari 2020, a prolongá e koperashon entre Kuerpo di Bombero Hulanda Karibense (BKCN) i e instituto di entrenamentu di bombero BOGO, pa un periodo di 2 aña.
BKCN i BOGO ya tin vários aña kolaborando ku éksito pa edukashon di bombero pa BKCN. E prolongashon di e akuerdo ta firmá pa e Komandante General Interino di BKCN, Albert Gieling i direktor di BOGO, sr. Herry Ester. Gieling ta deklará ku BKCN i BOGO a kolaborá di manera positivo i agradabel durante e último añanan: ‘BOGO ta un sosio hopi eksperto i komprometé den kapasitashon di bombero’.
BOGO ta un instituto di Hulanda Oropeo ku ta ofresé entrenamentu di bombero pa ’manschap’ i sup-ofisialnan. BOGO i BKCN ya tin algun aña trahando huntu brindando entrenamentu i èksamen di bombero. Awor a prolongá e kolaborashon aki pa un periodo di dos aña.
Pa BKCN ta importante pa e bomberonan ta bon eduká i entrená. Den lei i reglamentunan tin rekisitonan haltu establesé pa edukashon, èksamen, entrenamentu adishonal i práktika na BKCN. BOGO ta sostené BKCN pa por kumpli ku e eksigensianan aki. Ta traha segun e prinsipio di ‘train the trainer’. Den esaki BOGO ta duna entrenamentu adishonal na e instruktornan di BKCN tokante e konosementu i abilidatnan mas aktual. E instruktornan di BKCN e ora ei mes ta duna e lèsnan, ehersisionan i entrenamentu adishonal den e kuerpo mas tantu posibel. Asina konosementu i abilidatnan ta keda den e propio kuerpo.
E koperashon ku BOGO ta yuda BKCN mantené su empleadonan kompetente na nivel haltu riba tur tres isla.