Eksepshon nobo kondishonnan areglo di emergensia SZW
Despues di un periodo di paro i siere di hopi empresa, awor nos a drenta un fase nobo. Poko poko mas i mas kompania ta habri nan porta bèk. Dunadónan di trabou tin te 12 di òktober pa apliká pa e areglo di emergensia di SZW. E kompensashon den gastu laboral ta yuda tene personal den servisio. Sinembargo, un opstákulo pa hopi dunadó di trabou ta ku empleadonan no por traha durante e orarionan pa kua a pidi e kompensashon p’e. Unidat SZW p’esei, den konsulta ku ministerio, a disidí hasi eksepshon posibel pa e fase nobo aki tambe. Asina empresanan por habri bèk maske kisas esaki no ta fruktífero ainda.
Empresarionan ku ke habri bèk òf ku a kaba di habri bèk, ta enfrentá desishonnan difísil. Mester di personal esensial pa duna servisio mínimo i pa trabounan ku ta pertenesé na e empresa. Pero, e demanda for di merkado no ta meskos mas ku promé ku 13 di mart 2020. Esaki, pa motibu di e sirkunstansianan opstruktivo dor di e vírùs di corona.
Den algun kaso e eksepshon nobo aki ta hasi posibel ku dunadónan di trabou ta laga empleadonan ku funshonnan esensial, traha (parsialmente) atrobe. Pero, ainda ta keda risibí sosten den gastu laboral pa nan. Por pensa riba funshonnan nesesario pa por hasi e aktividatnan mínimo ora di apertura. Dunadónan di trabou por entregá un petishon pa esaki na unidat SZW via noodregelingszw@rijksdienstcn.com. Den e aplikashon mester splika kua funshon ta esensial pa e empresa habri bèk, kua empleado lo ehekutá esakinan, kiko ta nan funshon i e kantidat di ora ku nan lo traha atrobe.
Unidat SZW ta evaluá pa kada aplikashon, pa kua parti e empleadonan por risibí supsidio tòg miéntras nan ta traha. E eksepshon aki ta bálido pa máksimalmente dos luna despues di risibí aprobashon di unidat SZW. Na momentu di reapertura ainda mester tin un pèrdida di volúmen di benta di mínimalmente 20% kompará ku e situashon promé ku e krísis di corona.
Na aprel 2020 unidat SZW i ministerio a ofresé un eksepshon komparabel. E biaha ei a ofresé kompanianan ku no tabata operativo pero ku si tabatin ku ehekutá trabounan nesesario pa por kontinuá ku nan aktividatnan despues di e krísis.