Maneho di kompra RCN: 91 porshento lokal den promé mitar di 2020
E promé mitar aña ku a transkurí Rijksdienst Caribisch Nederland a kumpra 91 porshento di su pedidonan lokalmente. Ku esaki tabatin un montante di mas òf ménos 15 mion dòler metí den e promé mitar di 2020. Den 2019, a kumpra 88 porshento di e pedidonan di kompra, alrededor di 33 mion dòler, na Aruba, Kòrsou, Boneiru, Sint Maarten, Sint Eustatius i Saba.
Un di e metanan di e maneho di kompra di Rijksdienst Caribisch Nederland (RCN) ta,
pa sostené e ekonomia lokal di e parti karibense di Reino. Den esei RCN ta aspirá kombenionan di largu plaso, di kuater te seis aña, pa brinda empresarionan lokal sufisiente siguridat. Esaki ta importante pa entre otro garantisá ku empresarionan lokal por hasi eventual invershonnan nesesario, por ehèmpel den personal.
Na 2019 a hasi 88 porshento di e pedidonan di kompra lokalmente. Dor di bolbe tira un mihó bista riba e posibilidatnan lokal, e kantidat akí a krese den e promé mitar di 2020 te na 91 porshento. Durante e krísis di corona RCN a disidí di kontinuá ku su kompranan riba e nivel normal i unda tabata posibel pa adelantá esakinan, pa evitá ku empresarionan lo a sufri pèrdida di entrada. Ta kalkulá ku e 91 porshento di otorgamentu di enkargo lo keda henter aña na vigor. E 9 porshento ku no ta kumpra lokalmente tin di aber ku kombenionan di largu plaso ku suministradónan na Hulanda, mayoria bia riba tereno di ICT. Pa e pedidonan akí tambe ta wak si por desviá di esakinan.
Prosedura di destaho públiko
Ora ta trata di kompra ku un volúmen di benta di $ 30.000 òf mas riba un periodo di kuater aña, RCN sèmper ta kuminsá un trayekto di destaho públiko lokal. Esaki ta tuma lugá mas òf ménos 50 bia pa aña promedio. Pa un trayekto di destaho públiko ta invitá empresarionan lokal pa partisipá pa medio di un aviso, pa ta sigur ku no ta lubidá ningun partido. Ora di inskripshon, empresarionan ta risibí tur dokumento rekerí pa por entregá un bon oferta.
Durante e prosedura, ofresedónan tin solamente kontakto ku e konseheronan di kompra. Un komishon di evaluashon interno ta evaluá independientemente di otro e kontestanan anonimisá, (no sa durante di e evaluashon di kua ofresedó ta trata) riba e preguntanan hasí. Despues di e evaluashon individual ta kompará e resultadonan ku otro i ta ekspresá esaki den un sifra promedio di kalidat. Despues numa ta anunsiá e preis ofresé i ta hasi e kombinashon ku e sifra di kalidat. Di e forma akí RCN kier garantisá un evaluashon mas independiente posibel i skohe pa e mihó relashon di preis-kalidat. Ta kompartí e resultadonan ku e ofresedónan. Nan tin e posibilidat pa hasi opheshon kontra e resultado.
Den kaso di enkargonan di kompra bou di $ 30.000 den kuater aña, ta sigui un prosedura di kompra lokal mas kòrtiku. Pa e prosedura di kompra mas kòrtiku ta pidi tres suministradó direktamente pa duna un oferta.