Kompensashon di un solo bia pa media na Hulanda Karibense
Na Hulanda Karibense tambe e konsekuensianan di e krísis di corona tin impakto grandi riba media. Den tempunan insigur manera esaki, e demanda pa informashon ta oumentá, miéntras e kanalnan di media, ku hopi biaha ta dependé di aviso, ta mira nan entrada bai atras.
Komo ku hustamente den e periodo di krísis aki ta di gran importansia pa suministro di informashon keda na nivel, Minister Arie Slob pa Enseñansa Básiko i Avansá & Media a komprometé un kompensashon di un solo bia na nòmber di ministerio di OCW.
E sosten finansiero aki ta destiná pa korant-, radio- i televishonnan na Hulanda Karibense ku ta kumpli ku algun kriterio:
- Ta proveé notisia profeshonal i komersial tokante Saba, Sint Eustatius i Boneiru en general i notisia tokante e vírùs di corona en partikular durante un periodo di tempu indefiní;
- Ta aktivo ku dunamentu di informashon general for di promé ku 19 di mart 2020.
- Ta registrá na un di e Kámaranan di Komèrsio na Hulanda Karibense;
- Ta riba e lista di prensa di departamentu di komunikashon di RCN;
- Ta eksperensiá ku e kontinuidat ta bou di preshon komo konsekuensia di e krísis di corona.
- No mester ta bankarota ni a entregá aplikashon pa un suspenshon di pago riba 19 di mart 2020.
Pa radio i televishon ta konta tambe ku e medio mester ta konosí na ‘Agentschap Telecom’ i e mester tin pèrmit di ‘Commissariaat voor de Media’ pa por transmití.
Pa organisashonnan ku ta kumpli ku e kondishonnan ariba menshoná, a pone un total di
US$ 66.000 disponibel. Kanalnan di televishon por bini na remarke pa un kompensashon di un bia di US$ 6.000. Pa kanalnan di radio i pa korant, e montantenan di un solo bia ta respektivamente US$ 3.000 i US$ 2.000.
Pago di e kompensashon ta kana via di OCW. For di e ministerio a hasi un inventario di e diferente organisashonnan di media na Boneiru, Sint Eustatius i Saba. Den e siman di 10 di mei último a aserká nan ku mas informashon, inkluyendo un formulario di aplikashon. Pa mas tardá 5 di yüni benidero mester entregá e formulario yená i firmá via di e-mail na OCW.