Mas mucha a nase den 2020 na Hulanda Karibense
Poblashon di Hulanda Karibense a krese den 2020 ku 818 persona, partikularmente komo resultado di migrashon for di estranhero. E kantidat di imigrashon i emigrashon a bai atras debí na e restrikshonnan di biahe relashoná ku corona. Tantu natalidat komo mortalidat tabata mas haltu ku den añanan anterior. E influensia direkto di corona riba mortalidat tabata chikitu: na Boneiru a konta 3 morto registrá di covid-19 den 2020, na Sint Eustatius i Saba no a registrá morto debí na covid-19. Esaki ta sali na kla for di e sifranan nobo di poblashon tokante Hulanda Karibense.
Boneiru a krese ku 830 habitante. Na Sint Eustatius e poblashon kasi no a oumentá, na Saba e tamaño di poblashon a baha. Loke partikularmente ta hala atenshon na Boneiru i Sint Eustatius ta e sifranan mas haltu di nasementu. E motibu pa esaki no a keda investigá. Loke sí ta konosí ta ku medidanan ku ta duna sosten sosioekonómiko a drenta na vigor e último dos añanan.
Boneiru: hopi hende muhé yòn ta haña yu
Poblashon di Boneiru a krese den 2020 ku 830 te 21,7 mil. E kresementu di poblashon ta komparabel ku e kresementu den 2019, pero ta haltu kompará ku e kresementu den e último sinku añanan. Den 2020 a nase 228 yu. E promedio di e añanan 2015-2019 tabata 192. Partikularmente bou di hende muhé di 25 te 30 aña e kantidat di yu ku a nase ta haltu.
E kantidat di kasonan di fayesimentu, 111, ta relativamente haltu. Nan ta mas ku den 2019 i tambe mas ku e promedio den e periodo 2015–2019. A muri partikularmente mas hende den nan sesenta i nan setenta aña. Na Boneiru a raportá 3 kaso di fayesimentu debí na covid-19 den 2020. Den 2021 te ku meimei di aprel ya a registrá 12 morto debí na covid-19.
Imigrashon pa Boneiru tabata mas haltu den 2020 kompará ku den añanan anterior. Imigrashon for di Hulanda Oropeo i Kòrsou a oumentá, pero a bin ménos migrante for di Repúblika Dominikano i Perú. Emigrashon a baha, partikularmente pa Kòrsou i Aruba, i un tiki ménos pa Hulanda Oropeo.
Sint Eustatius: imigrashon a baha ku mitar den 2020
Poblashon di Sint Eustatius a oumentá ku 3 persona te 3.142. E kantidat di nasementu tabata haltu kompará ku añanan anterior: 50 den 2020 kontra 30 den 2019 i promedio 32 den e periodo 2016–2019 [1]. Na Sint Eustatius partikularmente personanan den nan trinta aña a haña mas yu.
E saldo di migrashon ta negativo. E sifranan di imigrashon a baha kasi na mitar kompará ku e añanan anterior. E bahada di imigrashon ta ampliamente distribuí riba un kantidat di pais, pero partikularmente di Repúblika Dominikano a bin ménos migrante.
Saba: ménos studiante internashonal
E poblashon na Saba a baha den 2020 ku 15 persona te 1.918 habitante. E kresementu natural tabata negativo pa motibu di ménos nasementu i un tiki mas mortalidat. Imigrashon a baha konsiderabel. E motibu prinsipal di esei ta ku Medical School tabata ofresé solamente lès online di manera ku na final konsiderablemente ménos studiante di Merka i Canada a bin Saba kompará ku den otro añanan. Emigrashon tambe tabata mas abou.