Kòntròl konhunto riba hóreka i otro kompanianan Sint Eustatius
Na òktober i novèmber, Inspekshon di labor a kuminsá realisá inspekshonnan na kompanianan na Sint Eustatius. A enfoká prinsipalmente riba e sektor di hóreka i otro kompanianan. Tambe, a hiba akshon konhunto ku KPCN.
Den vários establesimentu di hóreka, a chèk orario di trabou i di sosiegu di e personal i a kontrolá si e dunadó di trabou tabata kumpli ku e lei di salario mínimo. Tambe a kontrolá si tabatin e servisionan di promé ousilio adekuá i a kontrolá pa posibel trabounan ilegal. No a haña ningun infrakshon durante e kòntròlnan. Esaki ta un resultado positivo.
Durante un inspekshon konhunto den otro sektor a haña tres ekstranhero ku tabata permanesé di forma ilegal riba e isla i pa kua no a duna un pèrmit di trabou. E tres personanan konserní ta bou di supervishon di KPCN. E doño di trabou a haña un prosèsverbal.
Banda di esaki, a implementá un seri di inspekshonnan basa riba señalnan. Na un kompania den e sektor di duna servisio a konstatá ku e empleadonan no tabata haña sufisiente tempu di sosiegu. E empleadonan mester tabata disponibel durante hinter e siman. Na un kompania den e sektor di komèrsio empleadonan tabata traha mas di 40 ora pa siman strukturalmente, sin ku tabata paga nan overtaim. Tur dos kompania a haña un atvertensia. Nan mester ahustá e situashon denter di un periodo spesífiko. Si esaki no tuma lugá, lo traha un prosèsverbal.
E lei ta stipulá restrikshonnan na e kantidat di ora di trabou pa asina garantisá ku e empleadonan no ta traha demasiado ora i ku nan ta haña e sosiegu sufisiente. Empleadonan tambe tin responsabilidatnan pafó di e lugá di trabou, manera responsabilidatnan di kuido. Aparte di traha na un manera saludabel i sigur, e Lei Laboral 2000 BES ta ofresé protekshon pa asina tin un bon ekilibrio entre trabou i bida privá.
E inspektornan laboral ta disponibel durante hinter aña via e number di telefòn di inspekshon trabou +599 781-5662 òf via meil arbeidsinspectie@rijksdienstcn.com.