Eksitoso konferensia digital ‘No Mas No More’ na Boneiru
For di 30 di novèmber te ku 2 di desèmber a organisá e konferensia ‘No Mas No More’ na Boneiru huntu ku ‘Taskforce Kinderrechten’. E konferensia tabatin komo meta traha huntu, konektá i kompartí konosementu tokante kon pa protehá mucha kontra di abuso, negligensia òf otro tipo di violensia.
Último dianan alrededor di 200 profeshonal den e área di derecho di mucha i violensia doméstiko a sigui un programa digital intensivo for di e seis islanan i Hulanda Oropeo. Temanan importante tabata, entre otro, eduká positivamente, kódigo di protekshon, koperashon den kadena i e skol amplio. Diputado Nina den Heyer a habri e konferensia ku un storia personal.
Un parti impreshonante di e programa tabata e obra teatral ‘Stop the beating’, presentá pa Archell Thompson i Jalisah Moniz. Ku e presentashon aki Archell ke krea konsientisashon di e impakto di abuso di mucha, pero tambe pidi atenshon pa storia di e agresor. Hopi biaha e agresor tambe ta (tabata) víktima su mes.
Durante di e konferensia a tuma paso pa sigui duna forma na e koperashon den e lucha kontra violensia doméstiko dentro di Reino. Tokante di esaki a realisá diferente akuerdo di trabou.
Partnernan den kolaborashon den e konferensia aki tabata: Ministerio di Salubridat Públiko, Bienestar i Deporte, Ministerio di Asuntunan Interno i Relashon den Reino i Entidat Públiko Boneiru.