Inougurashon ofisial di Plenchi di Trabou
Inougurashon di e sentro di labor, Plenchi di Trabou, a tuma lugá ofisialmente djárason 10 di febrüari. Diputado Nina den Heyer a kòrta e sinta simbóliko den presensia di empleadonan i algun invitado. Na Plenchi di Trabou ta trese servisio riba tereno di labor di OLB i di Reino huntu na un lugá sentral.
Durante e inougurashon a papia di e importansia di labor pa asina fortifiká ekonomia. Spesialmente den tempu di krísis, koperashon sólido entre e komunidat empresarial, esnan ku ta buskando trabou i gobièrnu ta di gran importansia.
E punto di salida di Plenchi di Trabou ta pa yuda habitantenan di Boneiru pa haña trabou. Den pasado departamentu di Apoyo Sosial i Laboral (MOA) di OLB tabata yuda hende ku ta buska trabou; awor esaki ta kai bou di e sentro di labor nobo. Kaminda trabou no ta un opshon, e empleadonan por duna informashon tokante tópiko manera kapasitashon (adishonal) i pèrmit di trabou. Tantu dunadó di trabou i esnan ku ta buska trabou por aserká e organisashon nobo aki.
Plenchi di Trabou ta situá na Kaya L. D. Gerharts 12, den e edifisio anterior di Girobank. E sentro di labor ta habrí den siman entre 8or di mainta pa 12or di mèrdia i di 1or di mèrdia pa 5or di atardi. Personanan ku ta interesá por akudí òf traha un sita via info@plenchiditrabou.com òf via (599) 715-8346. Empresanan por publiká vakatura i esnan ku ta buska trabou por registrá pa mediashon na www.plenchiditrabou.com.