Garantia di hipotek ta inisiá na Boneiru
Mas hende na Boneiru por kumpra nan mes kas danki na introdukshon di Garantia di Hipotek Boneiru (HGB) entrante 12 di febrüari 2021. E areglo ta inisiá pa un periodo di sinku aña i ta intenshoná pa 350 kas. E garantia di hipotek ta sòru pa un reda na momentu ku e kumpradó hañ’é den difikultat finansiero dor di situashonnan personal.
Mihó akseso na un kas di bo mes
Pa haña kas bon i pagabel na Hulanda Karibense ta un gran reto. P’esei gabinete ta empeñá su mes pa mehorá e disponibilidat di kas di hür i di kompra i tambe pa esaki ta pagabel. Un di e medidanan ku ta tuma ta inisio di un pilot ku HGB. HGB ta un garantia di hipotek na midí pa kua e Garantia di Hipotek Nashonal na Hulanda Oropeo a fungi kome base. Gabinete a pidi Fundashon Fondo di Garantia pa bo mes kas, pa desaroyá i implementá un garantia di hipotek.
HGB ta hasi posibel pa sera un hipotek ku menor riesgo finansiero i esaki pa e balor kompletu di e kas. E HGB ta na vigor ora ta kumpra un kas eksistente òf ora ta traha un kas nobo na Boneiru. Di e manera ei un grupo mas grandi di kumpradó di kas por finansiá nan mes kas. Ora hendenan pasa pa un kas di nan mes, posiblemente mas kas di hür (sosial) ta bira liber tambe. Ku e garantia di hipotek e akseso na kas di kumpra ta mehorá i por kontribuí ku mas habitante di Boneiru por biba pagabel.
Introdukshon di e garantia
Por sera e garantia di hipotek pa kas di un suma máksimo di kompra di $225.000. E durashon di e garantia ta 30 aña máksimo. Por sera un hipotek ku garantia solamente na un banko ku ta kompletamente bou di supervishon di ‘De Nederlandsche Bank’ (DNB). E úniko banko na Hulanda Karibense ku na e momentu aki ta kumpli ku e kriterio aki ta Maduro & Curiel’s Bank (MCB). Pa e rason aki e pilot ta inisiá solamente na Boneiru.
Lo monitoria e efekto di e garantia di hipotek riba e merkado di kas na Boneiru, bon. Ora ku despues di sinku aña e pilot finalisá, lo disidí si lo implementá e garantia na Hulanda Karibense i bou di kua kondishon.
Mas informashon
Lenk pa wèpsait: https://www.hypotheekgarantiebonaire.nl/
Lenk pa ‘Kamerbrief’: Hypotheekgarantie van start op Bonaire | Nieuwsbericht | Woningmarktbeleid