Défisit komersial Hulanda Karibense mas abou dor di bahada di balor di importashon den 2020
Na Hulanda Karibense e défisit komersial di tur e islanan a baha den 2020 kompará ku 2019. Sint Eustatius a konosé un bahada fuerte, siguí pa Boneiru i Saba. CBS ta informá esaki basá riba sifranan nobo.
E islanan di Hulanda Karibense tin défisitnan komersial struktural. Esei ta nifiká ku ta importá mas merkansia ku ta eksportá. Kompará ku Hulanda Oropeo ta produsí relativamente poko na Hulanda Karibense. Mayoria entrada di e islanan ta prosedente di servisionan (pa turismo). E artíkulo aki ta trata sinembargo komersio di merkansia.
Boneiru: promé bahada di défisit komersial den seis aña
E défisit komersial di Boneiru tabata 236 mion dòler den 2020. E balor tabata 2 porshento bou di e nivel di 2019. Ta promé biaha den seis aña ku e défisit komersial di e isla a baha kompará ku e aña anterior.
Boneiru den 2020 a importá merkansia na balor di 244 mion dòler. Eksportashon a suma 8 mion dòler. Tantu e balor di importashon (-4 porshento) komo di eksportashon (-33 porshento) tabata mas abou ku den 2019. E bahada pa loke ta trata importashon tabata pa kuenta di mashinnan i ekipo di transporte. Pa loke ta eksportashon, a eksportá partikularmente ménos materia prima.
Sint Eustatius: pa di tres aña konsekutivo balor di importashon mas abou
Den tres aña di tempu e défisit komersial di Sint Eustatius a baha ku un kuart. Den 2020 a importá na un balor di 39 mion dòler mas na merkansia ku a eksportá. E défisit komersial tabata 11 porshento ménos ku un aña anterior. E balor di importashon (-10 porshento) a baha pa di tres aña konsekutivo i a suma 41 mion dòler den 2020. Eksportashon di merkansia (1 mion dòler) tabata kontrali na 2019, 13 porshento mas haltu.
Saba: défisit komersial ta baha leve
E sifranan komersial di Saba tabata den 2020 komparabel ku esnan di 2019. E balor di importashon na merkansia (21 mion dòler) a keda kasi igual, miéntras ku eksportashon a krese ku tres kuart den balor. Na final e défisit komersial di Saba a baha den 2020 ku 1 porshento (21 mion dòler).
Bahada di défisit Boneiru debí na mashinnan i ekipo di transporte
No tin indikashon ku e bahada di e défisit komersial di Boneiru, pero tampoko esun di Sint Eustatius i Saba, ta resultado direkto di e krísis di corona. Boneiru al kontrali den 2020 tabatin pa mayoria kategoria di merkansia défisitnan mas grandi kompará ku 2019. E kategorianan aki tabata kontené tambe merkansianan ku a usa pa atendé ku e krísis di corona.
E bahada di e défisit komersial di Boneiru den 2020 ta kompletamente pa kuenta di mashinnan i ekiponan di transporte. Den e kategoria di merkansia aki un balor di importashon di 24 porshento mas abou, a resultá den un défisit komersial mas chikitu: 58 mion dòler. Un aña
anterior esei tabata ainda 76 mion dòler. E úniko otro kategoria di merkansia ku un bahada den défisit komersial den 2020 tabata kombustibel mineral (-23 porshento). Pa materia prima ta remarkabel ku e défisit kompará ku 2019 a dòbel di 4 mion pa 8 mion dòler.
Fuentenan:
Hulanda Karibense; balor di importashon, eksportashon i saldo komersial pa kada isla
Hulandes: https://opendata.cbs.nl/statline/#/CBS/nl/dataset/82658ned
Ingles: https://opendata.cbs.nl/statline/#/CBS/en/dataset/82658eng
Hulanda Karibense, Boneiru; balor di importashon, eksportashon i saldo komersial, SITC
Hulandes: https://opendata.cbs.nl/statline/#/CBS/nl/dataset/82659ned
Ingles: https://opendata.cbs.nl/statline/#/CBS/en/dataset/82659eng
Aklarashon
Défisit komersial
Mas importashon ku eksportashon di produktonan.