A finalisá promé investigashon di disponibilidat di indikadónan di Metanan di Desaroyo Duradero na Hulanda Karibense
Riba enkargo di e Komishon Fiho di Relashon den Reino, CBS a traha un rapòrt tokante disponibilidat di indikadónan di kapítulo 4 di e Monitòr Prosperidat Amplio i Metanan di Desaroyo Duradero (Monitor Brede Welvaart & SDG’s, abreviá ku MBW&SDG), pa Hulanda Karibense (CN). Esaki a keda publiká awe.
E investigashon a opservá disponibilidat di 267 indikadó di MBW&SDG, e asina yamá indikadónan SDGplus. (SDG ta para pa Sustainable Development Goals). E indikadónan di SDGplus ta indikadónan ‘ofishal’ di SDG, komplementá ku indikadónan di e Monitòr Prosperidat Amplio. Temanan ku ta hañá importante riba e islanan ta entre otro pobresa, ekonomia, naturalesa i turismo.
Solamente un kantidat limitá di indikadó di SDGplus, 34, ta disponibel pa Hulanda Karibense. Pa 176 indikadó no tin informashon disponibel. Esaki ta kasi 70 porshento di e indikadónan. 18 porshento di e indikadónan lo por keda midí sin muchu esfuerso. Un ehèmpel di e tipo di indikadónan aki ta “Morto den tráfiko”: ainda no tin estadístika di kousanan di morto pa Hulanda Karibense, pero un dòkter ta konstatá e kousa di morto si i lo por kolektá i analisá esaki. Un otro ehèmpel ta “Satisfakshon ku e tempu ku tráfiko di kas-trabou ta tuma”: esaki ta resultado di un enkuesta ku no ta hasí na Hulanda Karibense.
No opstante e kantidat relativamente chikitu di indikadónan ku ta disponibel kaba, lo por ta importante pa kuminsá monitòr esakinan pa asina por sigui e desaroyo di prosperidat amplio mas di aserka na Hulanda Karibense.
E lo por ta balioso pa e islanan tambe si duna kontinuashon struktural na e promé eksplorashon aki, di manera ku e islanan ta haña un bon bista tambe den desaroyo duradero.
Adishonalmente un ampliashon di e rapòrt aki ku sifranan tokante e otro paisnan karibense den Reino, Aruba, Kòrsou i Sint Maarten, lo por tin un balor agregá signifikante.