Inisio kampaña di informashon pa elekshon Tweede Kamer

Djárason 17 di mart 2021 tin elekshon di Tweede Kamer. Pa informá tur habitante di Boneiru, Sint Eustatius i Saba, Rijksdienst Caribisch Nederland (RCN) a inisiá promé di febrüari  un kampaña di informashon. E kampaña ta dirigí riba e proseso di vota i e medidanan ku lo tuma pa garantisá ku tur hende por vota mas seif posibel den e temporada eksepshonal aki.

Tweede Kamerverkiezing 2021 PAP

Tweede Kamer ta konsistí di 150 miembro ku ta representá komunidat Hulandes, pues e habitantenan di Boneiru, Sint Eustatius i Saba tambe. E miembronan di Tweede Kamer tin komo tarea kontrolá gobièrnu i huntu ku gobièrnu traha leinan nobo. Nan ta tuma desishon riba tópikonan manera enseñansa, kuido, medio ambiente, ekonomia i mas.

Kada 4 aña tin elekshon di Tweede Kamer. Habitantenan di Hulanda Karibense di nashonalidat Hulandes, ku tin 18 aña òf mas i ku no ta ekskluí for di e derecho di voto, por bai urna elektoral. Nan ta risibí un karchi di vota personal via di pòst.

Pa medio di aviso den korant, spòt na radio, poster i anunsio na televishon ta informá habitante di e islanan tokante e próksimo elekshon. Ademas ta hasi uso amplio di Facebook i por haña informashon general riba e wèpsait di e kampaña. RCN ta ehekutá e kampaña di informashon na enkargo di  Minister di Asuntunan Interior i Relashon den Reino. E entidatnan públiko ta responsabel pa organisá e elekshonnan.

Pa mas informashon bishitá www.rijksdienstcn.com/elekshonpatweedekamer òf e página di Facebook Tweede Kamerverkiezing CN2021.

Vota pa bo mes, sòru pa e futuro. Tur voto ta konta!