Turismo Hulanda Karibense a haña un sla duru debí na pandemia di corona

Notisia | 02-03-2021 | 16:16

Turismo na Hulanda Karibense na 2020 a haña un sla duru debí na medida i limitashon di buelo komo konsekuensia di e pandemia di corona.

E kantidat di bishitante ku a bula bin Sint Eustatius i Saba e aña ku a pasá, tabata 69 i 67 porshento mas abou ku na 2019. Na Boneiru a bini 58 porshento ménos bishitante ku avion. Esaki ta resultá for di sifra di CBS.

E promé dos lunanan di 2020 ainda tabatin bishitante* (aklarashon na final) na e islanan di Hulanda Karibense. Dia 14 di mart di 2020, a sera espasio aéreo di Boneiru, Sint Eustatius i Saba pa pasahero drentando for di Oropa i otro pais ku riesgo haltu.

58 porshento ménos pasahero na Boneiru

Na aña 2020, 66 mil bishitante a bin na e isla di Boneiru, kompará ku ménos ku 158 mil na 2019, un bahada di 58 porshento. Na yanüari i febrüari, e kantidat di bishitante ainda a krese ku 6.7 porshento kompará ku 2019. Despues di introdukshon di e medidanan di corona medio mart, turismo a kasi para por kompleto. Na yüli i ougùstùs sí tabatin un revitalisashon despues di un fleksibilisashon di e medidanan, pero e kantidat di bishitante a keda hopi mas abou ku na 2019. Na desèmber sí un tiki mas bishitante a bin Boneiru.

Toerisme Caribisch Nederland 2020 — E bahada mas grandi di e kantidat di bishitante na Boneiru tabata na di dos kuartal di 2020: 97 porshento ménos bishitante kompará ku e mesun kuartal na 2019. Un bahada igual tabata visibel sigun UNWTO den e region Karibense kompleto. Den e di tres i di kuater kuartal di 2020 e kantidat di bishitante na Boneiru a baha ménos fuerte (respektivamente 59.7 i 67.9 porshento) ku den e region Karibense kompleto (respektivamente 80.6 i 73.7 porshento).

Prinsipalmente ménos merikano na Boneiru

E turistanan ku a bini Boneiru na 2020 tabata prinsipalmente hulandesnan for di Oropa (alrededor di 43 porshento) i turista for di Aruba, Kòrsou i Sint Maarten (alrededor di 23 porshento). Merikanonan tambe tabata forma un parti konsiderabel di e turistanan (alrededor di 16 porshento). Debí na restrikshon di buelo e kantidat di merikano a baha kompará ku 2019 (9 punto di porshento).

Mal aña pa turismo krusero na Boneiru

Tambe pa turismo krusero, 2020 tabata un aña hopi malu. Na yanüari i febrüari ainda e kantidat di pasahero krusero na Boneiru a krese alrededor di 22 porshento kompará ku e mesun lunanan na 2019. Despues ku e medidanan di corona a drenta na vigor medio mart e tráfiko krusero a para, sin lanta kabes bèk pa resto di aña 2020. E kantidat di pasahero di barku krusero ku a hasi eskala na Boneiru durante henter 2020 pa e motibu ei tabata mas o menos 62 porshento mas abou ku den e aña anterior. Den e lunanan di zomer semper tin ménos barku krusero ta bini Boneiru debí na e temporada di orkan.

69 porshento ménos bishitante na Sint Eustatius

Na Sint Eustatius na yanüari i febrüari ainda tabatin kantidatnan di bishitante komparabel ku aña 2019. Na mart e kantidat di bishitante a baha. Despues e kantidat di bishitante no a subi 200 pa luna. Durante henter e aña, 69 porshento ménos bishitante a yega ku avion: di 10.5 mil na 2019 pa 3.3 mil na 2020. Na Sint Eustatius tambe e bahada di mas grandi di e kantidat di bishitante tabata den e di dos kuartal (96 porshento), pero den e di tres i di kuarter kuartal tambe e kantidat di bishitante tabata hopi mas abou ku na 2019 (respektivamente 81 porshento i 80 porshento mas abou).

67 porshento ménos bishitante na Saba

Na yanüari i febrüari 2020 e kantidat di bishitante na e isla ainda tabata komparabel ku 2019. Despues di e medidanan di corona, turismo a para. For di yüni te ku novèmber e kantidat di bishitante no a subi 100 pa luna. Na desèmber tabatin mas o ménos 200 bishitante.

Pa e aña kompleto esei a nifiká un bahada di e kantidat di bishitante aéreo di 67 porshento. Meskos ku riba e otro islanan di Hulanda Karibense, e bahada di e kantidat di bishitante aéreo di mas grandi na Saba tabata den e di dos kuartal (94 porshento), pero tambe den e di tres i di kuater kuartal, e kantidat di bishitante tabata basta mas abou ku den e mesun temporada na 2019 (respektivamente 86 i 87 porshento mas abou).