Empleadonan di BOPEC ta risibí kompensashon di retiro
E unidat di Asuntunan Sosial i di Labor (SZW) di RCN, a paga sesantia na 52 empleado di BOPEC ku a deklará fayit. Sesantia ta un kompensashon di un biaha na un empleado ku a duna retiro sin ku ta su falta. E dunadó di trabou ta obligá pa paga e kompensashon aki. Pero komo ku a deklará BOPEC fayit, e unidat SZW di RCN ta para garantia. Ta trata di un suma total di mas o ménos 1 mion.
A atendé e prosedura ku urgensia. Hasiendo esaki a tene kuenta ku e situashon den kua e empleadonan ya pa lunanan kaba no a risibí salario mas. E suma di e sesantia ta dependé di e kantidat di aña di servisio. Pa kada aña ku un empleado tabata den servisio e tin derecho riba salario di un siman, basa riba su último salario. Por ehempel, un empleado ku tabata 10 aña den servisio, e ora ei ta risibí un kompensashon di retiro igual na 10 siman di salario. E unidat SZW di RCN ta paga un montante neto.
Por lo pronto 24 miembro di personal lo keda empleá na e kuratòr di BOPEC. Esaki ta nesesario pa monitòr instalashonnan i pa sigurá e tereno. E empleadonan aki na promé instansia ta risibí pago di nan salario via di e krédito di herensia ku Entidat Públiko Boneiru (OLB) a pone disponibel.
Hefe di unidat SZW di RCN, Eric Brakke, ta kontentu ku e kolaborashon: ”Tur partido konserní ta mira e importansia di sosten na e empleadonan afektá. Dor di e kolaborashon rápido entre e kuratòr, atministrashon di BOPEC, OLB i nos organisashon, nos por a paga na korto plaso.”