Seguridat di muchanan semper ta na promé lugá. Sigur den un famia. Esaki mester ta klaro, tantu na Hulanda Oropeo komo na Hulanda Karibense. P’esei ta agregá na e Buki di Lei Sivil BES, ku mayornan ta responsabel pa e seguridat di mucha. I ku no por uza violensia síkiko ni físiko den edukashon di un mucha. Trata e mucha humiante tampoko ta permití. Esaki ya ta para asina den e Buki di Lei Hulandes Oropeo. Minister Dekker (Protekshon di derecho) i Sekretario di estado Paul Blokhuis (Salubridat Públiko, Bienestar i Deporte) a entregá e proposishon di lei ku ta regla e mesun kos aki pa Hulanda Karibense, na Tweede Kamer awe. Esaki ta kuadra ku e akuerdo di gobernashon aserkamentu violensia doméstiko i maltrato di mucha 2021-2024 entre Ministerio di VWS i gobiernu di e islanan di Hulanda Karibense.
Den e lei ta bira bisto ku tur tipo di violensia den edukashon ta prohibí. Por ehèmpel un tek pedagógiko, palabranan violento òf menasante, òf negligensia físiko i síkiko. Kue un mucha tene duru pa prevení peliger, por ehèmpel pa kita un mucha for di den un situashon peligroso, si ta permití. Asina ei e kambio di lei por inisiá kombersashonnan tokante kon mayornan por eduka muchanan sin violensia. Ku esaki e proposishon di lei ta kontribuí na prevenshon di maltrato di mucha. Sinembargo maltrato di mucha ya kaba ta kastigabel na Hulanda Karibense segun e Buki di Lei Penal BES.
E reglanan den e Buki di Lei Sivil BES no ta konta solamente pa mayornan so, sino tambe pa hendenan ku ta kuida i eduká un mucha. Manera un tutela òf mayor di kriansa, pero tambe welanan, tanta- i tionan ku en realidat ta eduká i kuida un mucha. E kuido pa un yu ta keda responsabilidat di e mayornan pafó di kas tambe. Na momentu ku mayornan ripara ku otronan ta maltratá i abusá di nan yunan, nan mester tuma akshon pa para esaki.
Banda di esaki, renunsiamentu di violensia den edukashon ta kuadra den e vishon pedagógiko ku e gobernashon di e islanan den Hulanda Karibense ta stipulá ku e organisashonnan lokal. P’esei e islanan ta sostené tambe pa registrá esaki den un lei.