Kasi 2 porshento ménos kupo di trabou na Hulanda Karibense den 2020
E kantidat di kupo di trabou pa trahadó ku ta den servisio i ta haña salario na Hulanda Karibense a baha ku kasi 2 porshento kompará ku e aña anterior. Na Boneiru, tabata trata di 240 kupo di trabou ménos, na Sint Eustatius i Saba e kantidat di kupo di trabou a keda meskos. CBS ta informá tokante esaki a base di su sifranan nobo.
E redukshon di kantidat di kupo di trabou pa trahadó ta sigui despues di un periodo di kresementu kontinuo di kupo di trabou. Entre 2011 i 2019, e kantidat di kupo di trabou na Hulanda Karibense a krese ku un promedio di 5 porshento pa aña, miéntras ku e poblashon a krese ku un promedio di 2,3 porshento pa aña. Di 2019 pa 2020, e kantidat di kupo di trabou a baha ku 1,7 porshento, miéntras e poblashon a oumentá ku 3,3 porshento. No a investigá kon e redukshon aki ta relashoná ku e konsekuensianan di e krísis di corona.
Na 2020, a suministrá un pakete di sosten di 47 mion dòler pa por karga ku e konsekuensianan aki. Na Boneiru, por ehèmpel, e kantidat di turista a baha ku kasi 60 porshento den 2020. Den término relativo, e redukshon di turismo na Sint Eustatius i Saba tabata ainda mas grandi, pero e kantidat tabata ménos.
E redukshon mas grandi di kupo di trabou na Boneiru den hóreka
E redukshon mas grandi di kupo di trabou na Boneiru tabata den e sektor di hóreka. Tambe a eksperensiá un redukshon di kupo di trabou den e sektornan di konstrukshon, transporte, informashon, komunikashon i kultura, rekreashon i otro servisionan.i Den un término ménos grandi, den sektor di industria i hür i komèrsialisashon di propiedat inmóbil tambe a eksperensiá un redukshon di kupo di trabou.
Kupo di trabou di hóbennan a baha mas
Ora mira e sifranan pa edat, mayoria kupo di trabou ku a disparsé tabata di hóbennan. Tantu den término apsoluto komo relativo, e redukshon tabata mas grandi den e kuponan di trabou pa hóben entre 15 pa 25 aña. Tambe tabatin ménos kupo di trabou pa persona entre 45 pa 55 aña i, den término ménos grandi, pa persona entre 25 pa 35 aña.
E promedio salario anual pa kada kupo di trabou a baha na Sint Eustatius
Na 2020, e salario promedio pa kada kupo di trabou na Boneiru i Saba a oumentá (ku 2,0 i 3,4 porshento respektivamente), miéntras ku na Sint Eustatius esaki a baha di forma relativo (-6,7 porshento). E redukshon ta tuma lugá prinsipalmente den kuponan di trabou den e sektor di konstrukshon.
Fuentenan (na Hulandes):
StatLine: Caribisch Nederland; banen en lonen, economische activiteit (SBI 2008): http://opendata.cbs.nl/statline/#/CBS/nl/dataset/82519NED/table?dl=43B17
StatLine: Caribisch Nederland; banen en lonen, geslacht, leeftijd: http://opendata.cbs.nl/statline/#/CBS/nl/dataset/82518NED/table?dl=4AE7E
StatLine: Caribisch Nederland; bevolking; geslacht, leeftijd, burgerlijke staat: http://opendata.cbs.nl/statline/#/CBS/nl/dataset/83698NED/table?dl=36E44
Lenknan relevante (na Hulandes):
Toerisme Caribisch Nederland in 2020 hard geraakt door coronapandemie: https://www.cbs.nl/nl-nl/nieuws/2021/09/toerisme-caribisch-nederland-in-2020-hard-geraakt-door-coronapandemie
Helft bedrijven Caribisch Nederland maakt gebruik van noodpakket: