Tour di informashon tokante skrinen di kanser na pechu
Den e último siman di òktober Bevolkingsonderzoek Caribisch Nederland ta duna informashon na vários lokalidat tokante e programa di skrinen di kanser na pechu. Tur persona por presentá na e bùs spesial ku pregunta i pa informashon tokante skrinen di kanser na pechu. Hende muhé entre 50 i 75 aña di edat por registrá mesora pa e skrinen.
Masoménos 1 pa 7 hende muhé ta haña kanser na pechu. E skrinen tin komo meta pa deskubrí kanser na pechu mas pronto posibel. Mas trempan detektá kanser na pechu, mas grandi e chèns di un tratamentu eksitoso. Tambe tin ménos nesesidat di un tratamentu drástiko si detektá kanser na pechu trempan. Pa e motibu ei tur hende muhé entre 50 i 75 aña di edat na Boneiru kada dos aña por partisipá grátis na e skrinen. Den e grupo di edat aki tin mas kaso di kanser na pechu.
E skrinen
Partisipashon na e skrinen di kanser na pechu ta grátis i boluntario. E skrinen ta tuma lugá den hòspital Fundashon Mariadal i ta dura masoménos 20 minüt. Durante e último lunanan a skrin mas di 400 di e mas di 3.000 hende muhé den e grupo di edat konserní na Boneiru. Esaki ta un bon komienso, pero no ta sufisiente. Pa e motibu ei Bevolkingsonderzoek Caribisch Nederland ta pidi atenshon pa importansia di skrinen i detekshon trempan di kanser na pechu.
Konsientisashon
Tur hende, pero prinsipalmente hende muhé entre 50 pa 75 aña ku tin pregunta tokante e skrinen, por akudí na e bùs di informashon ku den último siman di òktober ta pasa na vários lokalidat. Durante bo bishita na e bùs, bo por registrá mesora pa e skrinen. Trahadónan di Bevolkingsonderzoek Caribisch Nederland lo risibí interesadonan ku algu di kome i bebe na vários lokalidat:
| Djamars 26 di òktober |
17.00 – 19.00 na Warehouse (Kaya International) |
| Djaweps 28 di òktober | 17.00 – 19.00 na Warehouse (Kaya International) |
| Djasabra 30 di òktober |
10.00 – 12.00 na Tung Fong Store (Kaya Korona) |
| Djasabra 30 di òktober |
18.30 – 21.00 na Cocari, Rincon (den kolaborashon ku Prinses Wilhelmina Fonds) |
Mas informashon:
Wèpsait rivm.nl/bvocn