Ta parse ku turismo na Boneiru ta mehorando atrobe, 9 mil bishitante na yüni

Notisia | 20-08-2021 | 18:53

Turismo na Hulanda Karibense na 2020 a baha hopi pa motibu di e medida- i restrikshonnan di buelo a kousa di e pandemia di corona.

Komo ku e islanan ta pone diferente medida pa tene COVID-19 afó, e revitalisashon di turismo ta diferente pa kada isla. Turismo na Boneiru na yüni 2021 ya tabata na kasi 75 porshento di e nivel di yüni 2019. Na Saba i Sint Eustatius asaki tabata respektivamente 43 porshento i 33 porshento di e nivel di yüni 2019.
For di komienso di e pandemia te ku yüni 2021, ningun pasahero di barku krusero no a yega Boneiru. Esaki segun sifra nobo di CBS.

Na Boneiru turismo a bini ta subi poulatinamente for di novèmber 2020 pero a baha atrobe na na yanüari 2021 i despues na mart debí na medidanan di gobièrnu. For di aprel 2021 turismo ta krese atrobe di 3,4 mil bishitante na aprel te ku 9,1 mil bishitante na yüni. E oumento aki prinsipalmente ta debí ku kasi tur aerolínea ta bulando atrobe manera nan tabata bula na yüni 2019 tambe. Debí na e restrikshonnan di biahe ku ta na vigor na hopi pais, e parti di bishitante ku nashonalidat hulandes a krese fuertemente, for di un 57 porshento na 2019 pa 75 porshento na 2021. E parti di bishitante ku nashonalidat merikano a baha hopi, di 25 porshento na 2019 pa 9 porshento na 2021.

Saba

Kompará ku 2020 turismo na Saba a krese den e lunanan di aprel, mei i yüni. E kantidat di bishitante ainda ta mas abou ku promé ku e pandemia di corona. Na yüni 2021 Saba a atraé 300 bishitante: 43 porshento di e kantidat di bishitante na yüni 2019 (700 bishitante). Den e promé tres lunanan di 2021, pa luna a bini 100 bishitante. Esaki ta debí ku na Saba tabatin restrikshonnan severo na vigor di buelo pa e isla, asina ku tabatin ménos buelo pa Saba ku promé di e pandemia di corona. Riba dia promé di mei Saba a kuminsá ku reapertura di e isla, por mira esaki bèk den e kantidat di bishitante.

Sint Eustatius

Sint Eustatius ta laga e medidanan ku ta limitá turismo dependé di e grado di bakunashon di e poblashon. Na yüni 2021, 300 bishitante a bini, kaminda na yüni 2019 ainda 900 bishitante a bini Sint Eustatius. E parti di bishitante ku nashonalidat hulandes na 2021 tabata 70 porshento, mientras ku na 2019 esaki tabata mas o ménos 50 porshento. Por splika esaki komo ku den e di dos fase di reapertura di Sint Eustatius, a pèrmití habitante bakuná di Saba, Sint Maarten, Aruba, Kòrsou i Boneiru na e isla sin kuarentena.