Start treinen Kaleidoscoop pa empleado di akohida di mucha

Riba djasabra 7 di ougùstùs e promé treinen di e programa edukativo Kaleidoscoop pa empleado den sektor di akohida di mucha ta kuminsá. Treinernan di Boneiru, ku a risibí nan treinen aña pasa,ta duna e treinen aki bou di guia di Sentro Hubentut i Famia . Esaki ta e siguiente paso den e programa BES(t) 4 kids pa garantisá akohida di mucha di bon kalidat, seif i pagabel pa asina kada mucha tin e oportunidat pa desaroyá nan mes bon.

B4K

Pa garantisá ku muchanan yòn na Boneiru risibí akohida di mucha di bon kalidat, Sentro Hubentut i Famia a organisá e treinen bira treiner di Kaleidoscoop. Entretantu 8 persona na Boneiru a kaba e treinen Kaleidoscoop. Nan ta inisiá ku  treinen di tur kolaboradó pedagógiko na Boneiru entrante 7 di ougùstùs 2021.

E idea ta pa na 2023 e programa edukativo Kaleidoscoop ta disponibel den tur sentro di akohida di mucha i  pa ‘gastouder’ tambe hasi uso di e programa. Ademas ta ofresé e programa edukativo pa uzo den grupo 1 i 2 di skol básiko na Boneiru.

Kaleidoscoop den sektor di akohida di mucha

Kaleidoscoop ta un programa edukativo pa mucha di 2,5 te 6 aña. E ta un treinen ku a implementá pa sostené muchanan na Boneiru den nan hungamentu i siñamentu. E programa ta pèrkurá pa muchanan por desaroyá nan mes optimal i pa e transishon pa skol básiko kana fleksibel.

Kaleidoscoop ta hasi uzo di e boluntat di mucha pa siña dor di hunga. Siña aktivamente ta forma e núkleo di e método. Muchanan ta eksplorá, amplia i profundisá nan konosementu i eksperensia edukashonal den interakshon ku e lider i otro muchanan. Tambe ta dediká hopi atenshon na desaroyo di abilidat pa papia i pensamentu di mucha.
Un rutina figo ta pa yuda siña e mucha kiko ta sigui i ta enserá hunga pafó, hunga i traha den hukinan pa hunga i tempu pa interkambiá den gruponan chikí i grandi.

For di investigashon ta resultá ku Kaleidoscoop ta prepará muchanan bon riba enseñansa pa lesa i skirbi, saka sòm i otro materianan. Kaleidoscoop ta promové oportunidatnan di enseñansa di muchanan. E transishon di un akohida di mucha pa un skol básiko ta bira mas fásil. Ku Kaleidoscoop e mucha ta siña kaba pa pensa i pa ta independiente, ta siña plania i enfoká riba un tarea, resolvé problema, anda ku otronan i ekspresá nan mes bon den idioma. Danki na Kaleidoscoop, e mucha ta haña tambe konfiansa den su mes i un imágen positivo di su mes.