CBS ta lansa e Enkuesta Òmnibus na Boneiru, Sint Eustatius i Saba

Entre sèptèmber i desèmber 2021, entrevistadónan di Ofisina Sentral di Estadístika (CBS) na Boneiru, Sint Eustatius i Saba lo kuminsá e proseso pa bishitá personanan skohé na un manera áselekto, pa asina nan kompletá e enkuesta Òmnibus.

Centraal Bureau voor Statistiek

E enkuesta Òmnibus ta un enkuesta basá riba un investigashon pa medio di sondeo bou di personanan. E ophetivo di e investigashon aki ta pa haña un bista di e sirkunstansia di bida di e poblashon di Boneiru, Sint Eustatius i Saba. Den esaki ta trata tópikonan manera salubridat, bibienda i seguridat. Na Boneiru, lo aserká 1692 persona; na Sint Eustatius, 623 persona i na Saba 589 persona.

Pa por haña un idea di e sirkunstansia di bida na Boneiru, Sint Eustatius i Saba, CBS ta pidi koperashon di tur persona ku ta bai forma parti di e sondeo.

CBS tin e obligashon legal pa trata tur dato kolektá ku e nivel mas estrikto di konfidensialidat. Den e konteksto aki, CBS a tuma diferente medida pa protehá bo datonan. Tur e kolaboradónan lo tin un dokumento di identidat di CBS den nan poseshon. Ora solisitá esaki, e kolaboradó mester por identifiká su mes pa asina tur hende por ta sigur ku ta CBS ta kolektando e datonan.

CBS ta komprondé ku duna informashon den e tempunan difísil ku nos ta bibando aden aki no ta fásil. Pero sifranan konfiabel tokante  kon nos ta pará aki na Hulanda Karibense ta masha importante. Na e momento aki, gobièrnunan, sientífikonan, kompanianan i siudadanonan tin e nesesidat pa sa kon tur kos ta bayendo na Hulanda Karibense i su habitantenan. P’esei, CBS ta sigui kolektá dato. CBS ta spera ku e personanan lo sigui duna dato importante durante e tempunan aki i ta gradisí di antemano pa e komprenshon i koperashon.

Si tin pregunta i mester di informashon, tuma kontakto ku CBS na number di telefon +599 717 8676. CBS ta alkansabel di djaluna te ku djabièrnè entre 8 or di mainta i 5 or di atardi. Tambe por manda un emeil na caribischnederland@cbs.nl.

Por haña mas informashon tokante e Enkuesta di Òmnibus riba e página web

https://www.cbs.nl/omnibus. Por lesa riba e página web www.cbs.nl/huisbezoek kon CBS ta trata ku reglanan di seguridat riba e tres islanan di Hulanda Karibense i ku kiko ta tene kuenta kuné durante un bishitá na kas.