Oumentá e oportunidatnan di merkado laboral pa studiantenan lokal

For di awor, e sentro di trabou, Plenchi di Trabou, ta introdusí un supsidio di gastunan di salario pa esnan ku ta traha ku studiantenan ku ta sigui e liña di estudio pa orientashon profeshonal (beroepsbegeleidende leerweg, BBL) na Boneiru. Ku, entre otro kos, e supsidio, Plenchi di Trabou ta kontribuí na oumentá e oportunidatnan di studiantenan riba e merkado laboral lokal.

Jobcentrum Plench di Trabou

Ku e supsidio di gastunan di salario, ta stimulá kompanianan finansieramente pa tuma studiantenan lokal den servisio, na moda ku studiantenan ta mas prepará pa e merkado laboral lokal. E supsidio ta pa un sumo máksimo di sinkuenta porshento di e salario mínimo legal vigente i ta dependé di e edat di e studiante. E dunadó di trabou ta paga e sobra parti di entrada di e studiante di BBL.

Tur kompania di formashon rekonosé den e sektor di konstrukshon, hóreka, teknologia òf sektor agrikultura por hasi petishon pa supsidio di gastunan di salario BBL na Plenchi di Trabou. Por hasi esaki dor di manda un e-mail pa loonkostensubsidie@plenchiditrabou.com. Un edukadó, rekonosé dor di ROA, mester guia e studiante di BBL pa asina por hasi un petishon riba e supsidio nobo.

A establesé e supsidio di gastunan di salario den kolaborashon ku  ROA CN  (e Konseho di Edukashon i Merkado Laboral), e departamento di Asuntunan Ekonómiko di OLB i e Ministerio di Enseñansa, Kultura i Siensia (OCW).

Tambe, aparte di e supsidio di gastunan di salario, Plenchi di Trabou, huntu ku FORMA i MBO Boneiru, a kuminsá ku un asina yamá 'nazorgtraject' ['trayekto di poskuido] pa studiantenan di MBO na Boneiru. Den e trayekto aki a prepará kandidatonan pa eksámen den e áreanan di Kuido i Bienestar, Deporte i Ehersisio i HoreKa i Teknologia pa e merkado laboral. Plenchi di Trabou a hasi esaki via vários seshon di informashon interaktivo.

Tokante Plenchi di Trabou

A establesé Plenchi di Trabou, un kolaborashon entre e unidat di RCN SZW i OLB, pa unifiká oferta i demanda riba e merkado laboral. E organisashon ta eksistí 8 luna i  entre tantu a yuda 80 habitante di Boneiru pa haña un trabou pagá. Tambe, kolaboradornan ta duna informashon tokante tópikonan manera rekapasitashon, pèrmit di trabou, i ta traha na diferente proyektonan di merkado laboral. Tantu doñonan di trabou i esnan ku ta buskando trabou por tuma kontakto ku Plenchi di Trabou na Kaya L. D. Gerharts 12. E sentro di trabou ta habri entre 8 or di mainta i 12.00 di mèrdia i entre 1 or pa 5 or di atardi. Personanan ku ta interesá por akudí na e sentro  òf traha un sita via info@plenchiditrabou.com o (599) 715-8346. Riba www.plenchiditrabou.com empresanan por publiká vakatura i personanan ku ta buska trabou por registrá pa mediashon.