Edifisio nobo di P-Direkt habrí ofisialmente
Entrante novèmber 2020 P-Direkt tin un edifisio nobo. Tòg e apertura ofisial a laga warda riba dje dor di e medidanan di corona, pero tambe pa finalisá e último trabounan na e ofisina.
Djárason 8 di sèptèmber tabata e dia grandi. Gezaghèber interino, sr. Reynold Oleana huntu ku sr. Edgar Heijmans (direktor saliente di P-Direkt) i sra. Marijke van den Boer (direktor entrante di P-Direkt) a habri e edifisio ofisialmente dor di desvelá e bòrchi di e ofisina. Seguidamente presentenan por a haña un rekorido di e ofisina bou di guia den grupo chikitu.
P-direkt ta un instansia di gobièrnu i ta sòru pa atministrashon di salario i personal pa ámtenarnan di Reino na Hulanda Oropeo. Pa por ta bon alkansabel pa e ámtenarnan di Reino na Hulanda den oranan di anochi tambe, a habri un filial na Boneiru na 2015. Dor di e diferensia den tempu, Boneiru por sigui duna e servisio. Si tin pregunta tokante asuntunan di personal despues di 5 or di atardi ora Oropeo òf si ke regla algu den e portal di P-Direkt, e ora ei ta haña un kolega di Boneiru na liña.
Na Boneiru P-Direkt tin 25 empleado ku ta repartí den dos tim. Tur e empleadonan ta di trein lokal dor di Scholengemeenschap Boneiru.