Konsulta kooperashon hudisial entre Hulanda, Aruba, Kòrsou i Sint Maarten eksitoso
Partikularmente den tempunan di krísis ta di sumo importansia pa sigui traha huntu i di forma konstruktivo den Reino. Awe e ministernan di hustisia Grapperhaus (Hulanda inkluso Hulanda Karibense), Bikker (Aruba), Girigorie (Kòrsou) i Richardson (Sint Maarten) a reuní tokante kooperashon riba tereno hudisial den Reino. E biaha aki Sekretario di Estado Knops di Asuntunan Interior i Relashon den Reino tambe a uni su mes na e reunion.
Protekshon di dato i interkambio di informashon
Pa kombatí kriminalidat ta importante pa e paisnan por interkambiá informashon rápidamente, ku un protekshon di dato sólido. P’esei e ministernan a yega na palabrashon pa pèrkurá ku protekshon di dato ta reglá di forma inekivokabel. Tambe a diskutí kon por sigui desaroyá e sentronan di informashon di e islanan.
Interkambio di konosementu i ekspertisia
Kalidat di e ministerionan públiko tambe ta okupá un puesto haltu riba agènda di e paisnan. Awe a yega na palabrashon pa asina anualmente kapasitá e fiskalnan lokal (di e islanan). Banda di esei a hasi palabrashonnan tokante estudio di derechi den e paisnan, di manera ku graduadonan di e universidatnan di Aruba i Kòrsou tin igual akseso na selekshon i estudio pa e profeshonnan di abogado, hues i fiskal na Hulanda. E palabrashonnan aki ta promové interkambio di e profeshonalnan aki entre e paisnan i ta kontribuí na kalidat i diversidat di e profeshonnan di toga.
Derechi di prosedimentu penal uniforme
Derechi di prosedimentu penal ta kontené e reglanan pa e forma kon polis i ministerio públiko por detektá violashonnan i pa e forma kon huesnan tin ku husga al respekto. Modernisashon di e Wetboek van Strafvordening na e tres islanan i Hulanda Karibense ta hasi e prosedimentu penal efisiente i ta otorgá mas derecho na e víktimanan. E mesun reglanan pa detekshon di echonan kastigabel ta konta pa polis i ministerio públiko den henter e parti karibense di Reino. Pa husga e kasonan ei, tambe huesnan por apliká e mesun reglanan. P’esei a yega na palabrashon pa e bukinan di lei aki tin mesun kontenido i ta drenta na vigor na mesun momentu.
Fortifikashon di estado di derecho
Tambe a diskutí tokante di fortifikashon di estado di derecho ku ta forma parti di e pakete di pais. Ku implementashon di e medidanan aki e kuater paisnan tin un bon komienso. Hulanda strukturalmente ta pone un montante te 45 mion euro disponibel pa fortifikashon di estado di derecho di e paisnan Karibense di Reino.
Meta di e konsulta semi anual ta, koordinashon tokante un aserkamentu komun koordiná di asuntunan hudisial komun di e islanan. Grapperhaus durante di e konsulta naturalmente ta defendé e interesnan tambe di Hulanda Karibense; Boneiru, Saba i Sint Eustatius. Pa motibu di e krísis di corona e Konsulta Hudisial di Kuater Partido (Justitieel Vierpartijen Overleg) (JVO) a bolbe tuma lugá di forma digital, bou di presidensia di Aruba.