Preis pa konsumidó 5,2 porshento mas abou na Boneiru
Den e di kuater kuartal di aña 2020 e preisnan pa konsumidó na Boneiru tabata 5,2 porshento mas abou ku un aña anterior. Un kuartal promé e preisnan tabata 4,8 porshento mas abou ku un aña anterior. Na Sint Eustatius e preisnan den e di kuater kuartal tabata 3,2 porshento mas abou ku un aña anterior i na Saba 0,8 porshento. Esaki CBS ta raportá a base di e índise di preis pa konsumidó (CPI).
Den e di kuater kuartal e preis di komestibel na Boneiru a subi kompará ku e kuartal anterior. Bèrdura fresku tabata 1,1 porshento mas karu den e di kuater kuartal, fruta fresku 2,0 porshento i batata tabata 8,3 porshento mas karu den e di kuater kuartal kompará ku den e di tres kuartal. Tambe karni tabata mas karu den e di kuater kuartal kompará ku un kuartal anterior.
E desaroyo di preisnan pa mobilario i artíkulo di kuido personal en kambio a kousa un efekto di bahada riba e desaroyo di e preisnan pa konsumidó.
Preisnan na Sint Eustatius 3,2 porshento mas abou
Na Sint Eustatius e preisnan pa konsumidó tabata promedio 3,2 porshento mas abou den e di kuater kuartal di aña 2020 kompará ku un aña anterior. Den e di tres kuartal esaki ainda tabata 3,3 porshento.
E desaroyo di preisn di komestibel tabatin un efekto di subida riba e desaroyo di e preisnan pa konsumidó. Asina e preis di fruta fresku a subi ku kasi 6,2 porshento kompará ku un kuartal anterior. Ademas e preisnan pa paña i sapatu a subi ku 2,5 porshento kompará ku un kuartal anterior.
Un bahada di e preis pa aparato di oudio i video i kos di hunga tabatin un efekto di bahada riba e desaroyo di preisnan den e di kuater kuartal.
Preisnan na Saba 0,8 porshento mas abou
E preisnan pa konsumidó na Saba tabata 0,8 porshento mas abou ku un aña anterior; den e di tres kuartal 2020 esaki tabata 1,6 porshento mas abou. E preis pa fruta fresku a subi ku 9,7 porshento kompará ku un kuartal anterior. Ademas artíkulo di kuido personal i paña i sapatu a bira mas karu. E preisnan pa paña i sapatu a subi ku 2,0 porshento den e di kuater kuartal kompará ku un kuartal anterior.
Desaroyo di preisnan promedio 2020
Den henter 2020, e nivel di preis promedio na Boneiru tabata 2,5 porshento mas abou ku den 2019. Na Sint Eustatius e preisnan tabata 1,5 porshento mas abou ku den 2019 i na Saba 0,7 porshento mas abou. E nivel di preis mas abou den 2020 pa gran parti ta kousá dor di e supsidio ku gobièrnu ta duna entrante promé di mei 2020 pa elektrisidat, awa i internèt. E tarifa fiho pa elektrisidat i awa ta sero dor di esaki i riba konekshon fiho di internèt tin un rebaho di 25 dòler.
Sifranan tentativo
E sifranan tokante e di kuater kuartal di 2020 ta tentativo i lo ta fihá definitivamente ku e publikashon tokante e promé kuartal di 2021.
Fuentenan:
StatLine: Caribisch Nederland
http://opendata.cbs.nl/#/CBS/nl/dataset/84046NED/table?dl=3C5D9