ACM ta stipulá tarifa máksimo pa distribushon di koriente na Hulanda Karibense

Autoriteit Consument & Markt (ACM) a stipulá e tarifanan máksimo pa distribushon di koriente na Hulanda Karibense. E tarifanan ta na vigor entrante 1 di yüli 2021.

Autoriteit Consument en Markt

ACM ta stipulá tarifanan máksimo pa produkshon i distribushon di koriente na Hulanda Karibense. E distribuidónan ta stipulá e tarifanan ku realmente nan lo kobra, a base di e tarifanan máksimo akí. Den esei e kompania di utilidat ta prosesá tambe eventual supsidio riba tarifa di koriente. Asina por ehèmpel, pa motibu di corona ta supsidiá e gastunan di e ret kompletamente i no ta kobra kliente tarifa di ret.

Pa uzo di koriente entrante 1 di yüli ACM ta ahustá e tarifanan máksimo pa por tene kuenta ku desaroyo di preisnan di kombustibel ku ta nesesario pa produsí koriente. Na 2020 e preisnan di kombustibel a baha drástikamente, den 2021 sinembargo preisnan di kombustibel ta subi atrobe. P’esei riba 1 di yüli 2021 e tarifanan máksimo di uzo variabel ta subi riba tur e islanan.

Boneiru

Pa Boneiru e tarifa máksimo di uzo variabel ta subi di 0,2554 USD/kWh pa 0,2948 USD/kWh. E tarifa máksimo di pagabon (prepago) ta subi di 0,4589 USD/kWh pa 0,4983 USD/kWh. Pa uzo di un kas di famia promedio na Boneiru esaki ta nifiká un subida di mas òf ménos USD 10 pa luna.

Sint Eustatius

Pa Sint Eustatius e tarifa máksimo di uzo variabel ta subi di 0,2736 USD/kWh pa 0,3224 USD/kWh. Pa uzo di un kas di famia promedio na Sint Eustatius esaki ta nifiká un subida di mas òf ménos USD 12 pa luna.

Saba

Pa Saba e tarifa máksimo di uzo variabel ta subi di 0,2851 USD/kWh pa 0,3692 USD/kWh. Pa uzo di un kas di famia promedio na Saba esaki ta nifiká un subida di alrededor di USD 21 USD pa luna. E subida akí, banda di subida di e preisnan di kombustibel, ta ser okashoná pa un parti tambe pa motibu ku mester a hasi un kalkulashon posterior pa motibu ku a tuma e parke solar den uzo. Despues a bin resultá ku Saba Electric Company (SEC) a logra muchu tiki entrada kompará ku e gastunan ku nan mester a hasi e tempu aya. E kalkulashon posterior un bia aki ta konserní mas òf ménos un terser parti di e oumentu di e tarifa máksimo di uzo i ya e ta kompletamente hasi kaba.