Di dos ‘Speed meet’ pa buskadó di trabou lokal i dunadó di trabou den sektor di turismo
Riba djabièrnè 22 di aprel Plenchi di Trabou, Tourism Corporation Bonaire (TCB) i Bonaire Hotel and Tourism Association (BONHATA) ta organisá di dos ‘speed meet’ pa konektá persona ku ta buska trabou i dunadó di trabou. Ku esaki e organisashonnan ke logra ku mas persona lokal ta traha den e sektor turístiko.
E Speed Meet ‘Ban traha den Turismo’ ta tuma lugá riba 22 di aprel 2022 di 10 or di mainta pa 2 or di mèrdia na Jong Bonaire (Kaya Simon Bolivar 16). Durante e Speed Meet aki, buskadónan di trabou i dunadónan di trabou ta topa otro na un sitio kaminda na un manera rápido nan por buska un mèch. Si tin un mèch, ta traha un siguiente sita. Durante e promé Speed Meet, 22 dunadó di trabou a sera konosí ku buskadó di trabou lokal. E buskadó di trabou por a adaptá su CV, prent esaki na e sitio mes i den korto tempu hiba vários kombersashon. Hotèl, resort, skol di buseo i lugánan di hóreka a tuma 6 kandidato mesora den servisio durante e promé Speed Meet i nan a traha 37 sita pa un siguiente kombersashon, dia pa kana huntu i sera konosí ku e trabou, i treinen interno.
Dor di konektá buskadónan di trabou lokal mesora ku kompanianan di hóreka na Boneiru durante e Speed Meet, Plenchi di Trabou, TCB i BONHATA ke oumentá e kantidat di profeshonal lokal den sektor di turismo. Ku esaki, empresarionan ta haña personal kalifiká i duradero, i tambe por buta buskadónan di trabou lokal riba funshonnan pagá. Asina e ‘speed meet’ ta kumpli ku tantu e nesesidat urgente pa personal for di e sektor di turismo komo ku e oumento di e oportunidatnan pa buskadónan di trabou riba e isla.
Oferta programa di trabou
Durante di e Speed Meet di 22 di aprel, lo ofresé tambe treinen básiko grátis. Un buskadó di trabou ta siña den un par di siman tur e abilidatnan nesesario pa un puesto, den teoria i den práktika. Despues di kompletá e treinen ku éksito, e partisipantenan ta risibí un sertifikado i ta pone nan direktamente serka un dunadó di trabou. Di e manera aki e partnernan kier oumentá mas tantu e oportunidat pa buskadó di trabou lokal den e sektor di turismo. E treinen ku ta ofresé ta pa bira, por ehèmpel, bartènder, waiter, kamarera i kokí(asistente).
E partidonan ta keda traha huntu pa buska solushon riba término largu pa garantisá sufisiente personal kalifiká lokal ku por kumpli ku e nesesidat den e sektor di turismo kresiente.
Inskribí
Dunadónan di trabou den sektor di turismo ku ta buska personal, i buskadó di trabou ku ta interesá den un trabou den sektor, por inskribí pa e ‘speed meet’ di 22 di aprel dor di manda un meil pa speedmeet@plenchiditrabou.com. Pa mas informashon por tuma kontakto tambe ku Plenchi di Trabou via +599 715 8346.