Inflashon Hulanda Karibense ta subi
Den e promé kuartal di 2022, produkto- i servisio di konsumidó na Boneiru tabata 9,9 porshento mas karu ku un aña anterior. Den e di kuater kuartal, ainda inflashon tabata 5,7 porshento. E prèis di koriente a subi ku 31,1 porshento i di awa ku 6,7 porshento kompará ku un aña anterior. E prèis di gasolin a subi ku 26,6 porshento kompará ku e promé kuartal di 2021. CBS ta indiká esaki a base di e índise di prèis di konsumidó na Hulanda Karibense.
Na Sint Eustatius prèis a subi ku 4,9 porshento anual. Den e di kuater kuartal esaki tabata 2,7 porshento. E oumento aki ta prinsipalmente debí na e oumento di prèis di koriente, awa i alimento. Na Saba, inflashon a subi di 4,0 porshento pa 6,7 porshento den e promé kuartal di 2022. Koriente, alimento i artíkulo di uso personal a provoká e oumento di inflashon na Saba.
Prèis na Boneiru a subi ku 4,9 porshento kompará ku e kuartal anterior
Kompará ku e último kuartal di 2021, prèis na Boneiru a subi den e promé kuartal di 2022 ku 4,9 porshento. E oumento ta debí prinsipalmente na e finalisashon di e supsidio di COVID-19 riba e tarifa básiko (vastrecht) di energia i awa for di desèmber 2021. Huntu ku e oumento di gastu variabel di energia, esaki a resultá den un oumento di 43,5 porshento riba prèis di koriente i 29,2 porshento riba prèis di awa. E gastunan di transporte a oumentá ku 3,6 porshento: gasolin a subi ku 6,8 porshento, diesel tabata 9,0 porshento mas karu i pasashi di avion a bira 2,7 porshento mas karu ku e kuartal anterior. Mas aleu, prèis di alimento a subi ku 1,7 porshento
Prèis na Sint Eustatius a subi ku 1,5 porshento kompará ku e último kuartal
Prèis pa konsumidó na Sint Eustatius a subi den e promé kuartal di 2022 ku 1,5 porshento kompará ku e último kuartal di 2021.
Prèis di awa i koriente a subi den e último kuartal ku 11,0 i 10,2 porshento kompará ku e di kuater kuartal di 2021. Muebel tabata 14,3 porshento mas karu den e promé kuartal di 2022 kompará ku e kuartal anterior.
Prèis na Saba a subi ku 2,4 porshento kompará ku e último kuartal
Na Saba, produkto di konsumidó tabata 2,4 porshento, pa promedio, mas karu ku den e di kuater kuartal di 2021. Bibienda a bira 5,4 porshento mas karu debí na oumento di prèis di koriente (25,1 porshento) i material di konstrukshon (3,4 porshento). Muebel a bira 19,0 porshento mas karu e kuartal aki i prèis di ekipo di oudio i vidio a subi ku 9,9 porshento. Prèis di artíkulo di uso personal a subi ku 9 porshento.
Sifranan tentativo
A ahustá e sifranan preliminar durante e di kuater kuartal di 2021 pa Sint Eustatius i Saba debí na un ahuste di e sifranan di enseñansa.
E sifranan di e promé kuartal di 2022 ta preliminar i lo keda stipulá definitivamente ora ku publiká e sifranan di e dos kuartal di 2022.
Fuentenan:
StatLine: Caribisch Nederland
https://opendata.cbs.nl/CBS/nl/dataset/84046NED/table?dl=BFA9