Outoridat Konsumidó & Merkado ta fasilitá pa hasi suministro di energia mas duradero pa Hulanda Karibense
Outoridat Konsumidó & Merkado (ACM) a stipulá e tarifanan máksimo pa elektrisidat i awa di bebe riba e islanan pa 2023. ACM ta hasi esaki anualmente i ora hasi esei ta paga tinu si e kompanianan di produkshon tin sufisiente espasio finansiero pa invershonnan ku tin mester pa hasi produkshon di koriente i awa di bebe duradero. Esei ta importante, pasobra riba tur e islanan tin proyektonan grandi di durabilidat planiá pa 2023 i pa despues tambe. Produkshon di energia i awa di bebe duradero riba Boneiru, Saba i Sint Eustatius no ta solamente bon pa klima segun ACM, pero e ta pèrkurá tambe pa preis di energia i awa di bebe riba e islanan ta ménos dependiente di e preisnan instabil di kombustibel.
ACM ta stipulá e tarifanan máksimo a base di e gastunan ku produktor- i distribuidornan ta hasi. E tarifanan máksimo pa elektrisidat i awa di bebe na Boneiru, Saba i Sint Eustatius lo subi leve entrante 1 di yanüari 2023, tambe komo konsekuensia di e preisnan di kombustibel. Klientenan ta paga den práktika sinembargo ménos pa awa i elektrisidat, pasobra ministerio di Asuntunan Ekonómiko i Klima i di Infrastruktura i Maneho di Awa a primintí supsidionan konsiderabel. E ministerionan a primintí [1] pa den 2023 redusí e gastunan fiho pa maneho di e ret di elektrisidat riba resibu di kumpradó, e asina yamá kargo fiho (vastrecht) na sero. Es desir, e kumpradó lo no paga kargo fiho, pero solamente e gastunan variabel, ekspresá den kWh di konsumo. Ademas lo supsidiá mitar di e parti di e gastunan variabel ei ku ta surpasá 0,38 USD pa kWh. Den 2023 tambe ta supsidiá e tarifanan di awa di bebedi bebe a base di e areglo di supsidio temporal awa di bebe BES 2018–2024.
Boneiru
Na Boneiru e tarifa máksimo di konsumo di elektrisidat ta subi di mas òf ménos 0,42 USD/kWh pa mas òf ménos 0,43 USD/kWh. Sinembargo, debí na e supsidionan, esaki lo resultá den un tarifa máksimo di uso di mas o ménos 0,41 USD/kWh pa un konsumidó. Ta te asta supsidiá e kargo fiho pa elektrisidat kompletamente. E konsumidó lo no paga pues nada den 2023 pa tin un konekshon di elektrisidat. Pa konsumo di un kas di famia promedio (mas òf ménos 210 kWh) esaki ta nifiká, inkluso e supsidio, ku un konsumidó lo bai paga mas òf ménos 85 USD pa luna mas na koriente entrante 1 di yanüari 2023.
E márgen superior pa tarifa di pagabon (prepago) ta subi di mas òf ménos 0,63 USD/kWh pa mas òf ménos 0,68 USD/kWh. Pa esaki tambe ta konta ku debí na e supsidionan e márgen superior real ta sali mas o ménos 0,41 USD/kWh.
E tarifa máksimo pa uso di awa di bebedi bebe ta subi di mas òf ménos 3,74 USD/m3 pa 3,91 USD/m3. Pa un kas di famia promedio esaki ta nifiká un subida di mas òf ménos 1,70 USD pa luna riba e resibu. E tarifa máksimo di konsumo fiho (vastrecht) pa un kas di famia ta subi di 41.24 USD pa luna pa 43.96 USD pa luna. Den e montantenan aki pa awa di bebe ainda no a tene kuenta ku e supsidionan.
Saba
Na Saba e tarifa máksimo pa uso di elektrisidat ta baha di mas òf ménos 0,52 USD/kWh pa mas òf ménos 0,43 USD/kWh. Na Saba tambe t’asina ku, debí na e supsidionan, esaki ta resultá pa e konsumidó den un tarifa máksimo di uso di mas òf ménos 0,41 USD/kWh. Na Saba tambe ta supsidiá e kargo fiho kompletamente. Pa konsumo di un kas di famia promedio esaki ta nifiká, inkluso e supsidio, ku un konsumidó na Saba ta bai paga mas òf ménos 85 USD pa luna na elektrisidat entrante 1 di yanüari 2023.
Sint Eustatius
Na Sint Eustatius e tarifa máksimo pa uso di koriente ta subi di mas òf ménos 0,43 USD/kWh pa mas òf ménos 0,50 USD/kWh. Sinembargo, debí na e supsidionan, esaki lo resultá pa e konsumidó den un tarifa máksimo di uso di mas o ménos
F0,44 USD/kWh. Ta supsidiá e kargo fiho pa elektrisidat kompletamente. E konsumidó na Sint Eustatius tambe pues lo no paga nada den 2023 pa tin konekshon di elektrisidat. Pa konsumo di un kas di famia promedio esaki ta nifiká, inkluso e supsidio, ku un konsumidó lo bai paga mas òf ménos 92 USD pa luna na elektrisidat entrante 1 di yanüari 2023.
E tarifa máksimo pa uso di awa di bebe ta baha di mas òf ménos 8,62 USD/m3 pa mas òf ménos 5,79 USD/m3. Pa un kas di famia promedio esaki ta nifiká un bahada di mas òf ménos 28 USD pa luna riba e resibu. E tarifa máksimo di konsumo fiho (vastrecht) pa un kas di famia ta subi di 93,76 USD USD pa luna pa 98,78 USD USD pa luna. Den e montantenan aki pa awa di bebe ainda no a tene kuenta ku e supsidionan.
[1] Wak Kamerbrief over nadere uitwerking tijdelijk prijsplafond energie | Kamerstuk | Rijksoverheid.nl