Inougurashon festivo di e promé parke infantil inklusivo na Rincon

Riba djaluna 19 di desèmber, di manera festivo a inougurá e patio di rekreo na Kolegio San Luis Bertran na Rincon, Boneiru den presensia di Dave Ensberg-Kleijkers, direktor di Jantje Beton, Regiline Sambo, Lider di Tim Jeugdzorg di ZJCN (Ministerio di VWS) i tambe hopi mucha.

Speeltuin Rincon

Jantje Beton, bou di enkargo di VWS, ta involukrá den renobashon di e patio infantil aki for di 2021. Muchanan di Rincon a partisipá di manera aktivo den e proseso di diseño. Basá riba nan deseo i ideanan, Bodifée Design a traha e diseño. A konbertí e patio infantil ku tabata yená ku yerba den unu seif, amikabel i kolorido kaminda tur mucha por hunga huntu. Den e diseño a tene kuenta ku e echo ku tantu e mucha ku i sin desabilidat por hunga huntu. Esaki ta hasi e parke infantil aki e promé parke infantil inklusivo di Boneiru.

Dave Ensberg-Kleijkers:

“Via Jantje Beton, nos ta kere ku ta hopi importante pa desaroyá parkenan infantil den Reino Hulandes. E posibilidat pa hunga i hasi ehersisio den bo propio ambiente residensial ta limitá na Boneiru. Miéntras ku hustamente esaki ta di gran importansia pa komo mucha bo desaroyá di manera saludabel.”

Regiline Sambo: Regiline Sambo:

“Hungamentu ta duna mucha  chikí plaser, e ta hasi nan mas ábil den moveshon i e ta un aktividat sosial. Tambe personanan di e komunidat ta reuní na un lugá kaminda nan por topa otro. VWS ta hopi kontentu ku renobashon di e parke infantil aki, tambe debí na su ubikashon den serkania di Cruyff Court i e skol”.

Jantje Beton
Jantje Beton ta e organisashon benéfiko ku for di 1968 ta trahando ku muchanan i hóbennan pa logra mas espasio di weganan i tambe desafiante i mas oportunidatnan pa hunga. Kada aña, mas di 350,000 mucha ta partisipa den e aktividatnan i proyektonan di Jantje Beton. Muchanan i hóbennan den posishonnan vulnerabel (pa hunga) ta haña atenshon adishonal. Jantje Beton ke sigurá ku tur mucha i hóben den Reino Hulandes por hunga i hasi ehersisio tur dia. Prinsesa Beatrix ta e protektora di Jantje Beton.

Zorg en Jeugd Caribisch Nederland – Ministerio di VWS
For di 1 di yanüari 2020, e maneho di e programa di Zorg en Jeugd Caribisch Nederland (ZJCN) ta responsabel pa e maneho di kuido i hubentut, i e legislashon di kuido na Hulanda Karibense (Boneiru, Saba i St. Eustatius). Ora un mucha ta menasá den su desaroyo, Jeugdzorg su tarea ta pa pèrkurá pa un situashon mas seif, di manera ku un mucha por sigui desaroyá su mes bon. Jeugdzorg ta hasi esaki por ehèmpel dor di ofresé ayudo edukativo, entrenamentu i intervenshon, kuido di yu di kriansa i akohida i guia pa muchanan den situashon di krísis.