CBS ta inisiá enkuesta Kuenta Nashonal Hulanda Karibense 2020
Durante e próksimo lunanan Ofisina Sentral di Estadístika (CBS) lo ehekutá un investigashon bou di sektor empresarial riba e islanan di Hulanda Karibense, komo parti di enkuesta riba Kuenta Nashonal. E aña di investigashon ta 2020. E investigashon aki tin komo meta pa hasi un inventarisashon di desaroyo ekonómiko riba Bonaire, Saba i Sint Eustatius. CBS lo aserká e empresanan riba e tres islanan pa kompletá e kuestionario.
CBS lo publiká e resultadonan di e investigashon den e último kuartal di aña 2022.
Algun resultado di e investigashon di 2019:
- E produkto interno bruto (bbp) di Boneiru a oumentá ku un volúmen di 6,3 porshento na 2019. Na Sint Eustatius i Saba tabatin un bahada di respektivamente 8,6 porshento i 5,3 porshento.
- E balor agregá di konstrukshon na Boneiru a subi ku 23,3 porshento. Komersio a probechá di e kresementu fuerte den konstrukshon, debí na oumento di importashon di material di konstrukshon dor di kompanianan ku ta bende material di konstrukshon. Otro kompanianan den e sektor di komersio, manera supermerkado, tambe tabatin bon resultado na 2019. E balor agregá den komersio a oumentá ku 10,1 porshento, i den hóreka ku 11,2 porshento.
- E bahada di 8,6 porshento na Sint Eustatius ta debí na algun kompania grandi riba e isla. E kompanianan aki ta produsí prinsipalmente pa eksportashon i ta dependé di desaroyonan regional den sektor petrolero.
- E disminushon na Saba a ser okashoná pa konstrukshon i enseñansa. E balor agregá di enseñansa a baha, pa motibu ku tabatin ménos studiante na 2019. E echo ku konstrukshon a baha kompará ku e aña anterior ta debí ku na 2018 tabatin mester di hopi trabou pa drecha e dañonan kousá pa orkan Irma i Maria.
Pa por garantisá éksito di e investigashon riba tur tres isla, CBS ta pidi kooperashon di tur empresa. Pa lei, CBS tin e obligashon di trata tur dato rekolektá na un manera estriktamente konfidensial.
Pa mas informashon i pregunta of yudansa ku e kuestionario por tuma kontakto ku ofisina di CBS.
CBS Caribisch Nederland
Bulevar Gobernador N. Debrot 67, unit 9
Kralendijk Boneiru
Númber di telefòn: +599 717 8676
Email: caribischnederland@cbs.nl
CBS ta gradisí tur empresa di antemano pa e koperashon.