Plenchi di Trabou ta selebrá un aña di eksistensia
E sentro di trabou Plenchi di Trabou djaluna 14 di febrüari a selebrá su promé aña di eksistensia, den presensia di Sekretario di Estado Van Huffelen. E sentro di trabou di Boneiru a habri su porta riba 10 di febrüari 2021 i ta mira bèk riba un aña di komienso bunita. Aña pasá a registrá 1011 hende ku ta buska trabou na Plenchi di Trabou i 106 habitante di Boneiru pa medio di mediashon aktivo di e sentro di trabou a haña un trabou pagá. Banda di esaki hopi otro hende a haña trabou ku yudansa di Plenchi di Trabou.
Ku e apertura di e sentro di trabou Plenchi di Trabou un aña pasá a realisá un di e metanan di e Akuerdo Intergubernamental. Aktualmente tin un kolaborashon sólido entre Entidat Públiko Boneiru, ministerio di Asuntunan Sosial i Empleo i unidat RCN na Boneiru. A lanta Plenchi di Trabou pa trese pedida i oferta riba merkado laboral huntu. Si buskadó di trabou tin un distansha grandi di e merkado laboral, Plenchi di Trabou ta usa instrumento di merkado laboral, manera programa di trabou, pa duna e hendenan aki tambe un chèns pa drenta merkado laboral atrobe. Tambe e kolaboradónan diariamente ta duna informashon tokante tópiko manera solisitá, posibilidat di karera, desaroyo di karera, kapasitashon (adishonal) i pèrmit di empleo. Dunadó di trabou serka Plenchi di Trabou ta haña informashon tokante reklutá, selekshon i mantené personal i tokante di e posibilidatnan di e maneranan di pago. Tantu buskadónan di trabou komo e dunadónan di trabou entretantu sa bon kon nan por haña Plenchi di Trabou.
Na 2021 Plenchi di Trabou entre otro a empeñá pa hende ku a pèrdè nan trabou pa motibu di un bankarota. Pa motibu di e krísis di corona na 2021 mas frekuente ku normal tabatin hende ta buska trabou. Sigur mil hende a registrá komo buskadó di trabou e aña ku a pasa. No opstante e oumento grandi aki di e kantidat di kliente, e organisashon a sera aña ku solamente 520 buskadó di trabou aktivo.
Ora ekonomia den verano a drecha enormemente pa motibu di e turismo ku a bini bèk, tabata espesialmente e dunadónan di trabou ku tabata akudí pa personal. P’esei Plenchi banda di enkuentro pa nètwèrk i programa di trabou na novèmber di 2021 tambe a organisá un ‘speed meet’ eksitoso den kolaborashon ku Bonhata i TCB, pa pone kompania den e sektor di turismo i buskadó di trabou den kontakto ku otro. E aña benidero Plenchi, ku programa di trabou, speed meet i enkuentro di nètwèrk ke kontribuí mas na e yenamentu di e falta di personal den entre otro e sektornan di konstrukshon, téknika i turismo.
Kontakto ku Plenchi di Trabou
Tantu dunadó di trabou komo buskadó di trabou por akudí na Plenchi di Trabou na Kaya L.D. Gerharts 12. Kada dia di trabou e sentro di trabou ta habrí entre 8 or di mainta i 12 or di mèrdia i di 1 or di mèrdia te 5 or di atardi. Persona ku ta interesá por kana drenta òf traha un sita via info@plenchiditrabou.com òf (599) 715-8346. Riba www.plenchiditrabou.com dunadó di trabou por pone un vakatura i buskadó di trabou por registrá pa mediashon.