Sekretario di Estado Alexandra van Huffelen ta bishitá parti Karibense di Reino

Notisia | 02-02-2022 | 16:47

Durante e bishita aki e Sekretario di Estado ke haña informashon tokante asuntunan ku ta importante pa e islanan manera seguridat di eksistensia, enseñansa, ekonomia i kuido di naturalesa. Aparte di enkuentro- i reunionnan ofisial, durante su bishita e Sekretario di Estado ke drenta den kontakto ku mas tantu siudadano posibel. Pa e motibu ei a traha un programa variá ku espasio pa topa siudadano- i empresarionan. Sekretario di Estado Van Huffelen: “Mi promé kontaktonan digital tabata hopi ameno. Mi ta hopi entusiasmá pa hiba kombersashon personal i sera konosí ku e parti Karibense di nos Reino.”

Kòrsou

Riba djaweps 10 di febrüari e Sekretario di Estado ta yega Kòrsou, kaminda entre otro e lo hiba kombersashon ku Gobernador, Promé Minister, Konseho di Minister i Presidente di Parlamento. Un enkuentro ku e Komishon Nashonal di Reforma pa papia tokante e desaroyonan di vários aña tambe ta riba programa. E Sekretario di Estado ta bishitá e baraknan i vários bario na Kòrsou kaminda e ta papia ku siudadano- i empresarionan. Banda di esei tambe tin un bishita pa Plasa Bieu i e monumento di Tula riba agènda. Na e monumento e Sekretario di Estado ta papia ku vários persona tokante e pasado di sklabitut.

Boneiru

Riba djadumingu, 13 di febrüari, e Sekretario di Estado ta realisá un bishita pa Boneiru. Einan e ta hiba kombersashon ku e Representante di Reino suplente, Gezaghèber, Kolegio Ehekutivo i Konseho Insular. Tambe e ta kombersá ku representantenan di Diálogo Sentral i e ta bishitá Plenchi di Trabou, kaminda e ta papia ku personanan ku ta risibí sosten. Riba djamars, 15 di febrüari, e Sekretario di Estado ta bishitá algun sitio kaminda e ta topa hendenan ku ta ehersé trabou riba tereno di energia duradero, pobresa i bibienda sosial.

Aruba

Riba djamars, 15 di febrüari, e Sekretario di Estado ta yega Aruba. Aki tin kombersashon planiá ku Gobernador, Promé Minister, Konseho di Minister i e Presidente di Parlamento. Banda di esei, e Sekretario di Estado ta hiba un kombersashon ku direktor di Banko Sentral, representantenan di e sektor di turismo i di komèrsio. Tambe lo tin enkuentro ku representantenan di sektor di kuido, un kaminata di arte pa sera konosí ku artistanan, tin un bishita riba agènda pa fundashon Casa Cuna i un bishita pa Arikok National Park. Banda di esei e Sekretario di Estado ta papia ku hopi persona ku ta komprometé nan mes pa ku Aruba pa medio di organisashonnan sosial.

Sint Maarten

Riba djaweps, 17 di febrüari, e Sekretario di Estado ta bai Sint Maarten kaminda e ta papia ku Gobernador, Promé Minister, Konseho di minister, Presidente di Parlamento i representantenan di Organisashonnan No Gubernamental (NGO). Tambe tin un bishita pa Point Blanche planiá riba e mesun dia. Mas aleu tin kombersashon ku figuranan importante di sektor di turismo. Ademas, e Sekretario di Estado ta topa ku personanan ku a haña nan konfrontá ku problema despues di orkan Irma i a plania un gira den kuadro di e rekonstrukshon. Tambe e lo presensiá trabou di personal maskulino i femenino di Wardakosta.

Sint Eustatius

Riba djadumingu 20 di febrüari, na final di dia e delegashon ta sigui pa Sint Eustatius, kaminda e Sekretario di Estado tin un enkuentro ku e Komisario di Gobièrnu Sentral i Komisario di Gobièrnu Sentral Suplente, e miembronan di Konseho Insular, un empresario hóben i STENAPA, St. Eustatius National Parks Foundation. E ta bishitá entre otro Fort Oranje, e parke solar, un sitio pa akohida di mucha i un proyekto di bibienda sosial, pa tende aya di abitantenan kiko nan ta haña importante.

Saba

Riba djamars 22 di febrüari, e Sekretario di Estado ta yega Saba, na unda e ta kombersá ku e Gezaghèber, Kolegio Ehekutivo i Konseho Insular. Tambe tin kombersashon planiá ku un empresario hóben i algun siudadano tokante e influensia di pobresa riba e bida diario. Durante un gira riba e isla ku ta tuma lugá e siguiente dia, e Sekretario di Estado ta hiba un bishita entre otro na proyektonan di resiklahe, un hydroponics farm, e haf (inkluso fèri) i un skol. 

Durante e bishita lo sigui tur medida lokal relashoná ku Covid. Tambe lo ahustá e programa si e situashon ta eksigí esaki.

Riba djarason, 23 di febrüari, Sekretario di Estado Van Huffelen ta regresá Hulanda.