Reunion eksitoso entre ministernan di Hulanda, Aruba, Kòrsou i Sint Maarten tokante kolaborashon hudisial
Riba 24 di febrüari e Konsulta Hudisial di Kuater Pais (Justitieel Vierlanden Overleg, JVO) a tuma lugá entre e ministernan di Hustisia Yeşilgöz-Zegerius (Hulanda), Tjon (Aruba), Pisas (Kòrsou) i Richardson (Sint Maarten). Pa motibu di e pandemia e konsulta e aña aki tambe a tuma lugá den forma virtual, bou di presidensia di Kòrsou.
E paisnan den Reino ta traha den estrecho koperashon pa kombatí kriminalidat. Pa Yeşilgöz-Zegerius, ku alabes ta responsabel pa e kadena hudisial na Hulanda Karibense, kolaborashon ku e islanan den Karibe ta esensial.
Ku su koleganan e la papia tokante e aserkamentu konhunto di krímen organisá. A hasi sierto palabrashon pa huntu atendé ku akuerdonan di ekstradishon i asistensia hudisial ku paisnan kaminda kriminalnan ta buska refugio. Tambe a palabrá kon ministernan huntu por sòru ku personal di Warda Kosta por operá den awanan teritorial di otro partner den Reino. Esaki ta importante pa e lucha kontra trafikashon di droga i hende.
Pa evitá ku hóbennan ta kai den krímen (organisá), e paisnan huntu ta atendé ku e prevenshon di malechor- i víktimanan. Esaki ta sosodé entre otro pa medio di uso di intervenshonnan di kondukta preventivo, manera ‘Ta abo so ta disidí ken bo ta’ i e Leerorkest. E resultadonan i inisiativanan nobo a keda presentá i diskutí.
Tambe a hasi palabrashonnan tokante interkambio di personal di prizòn pa asina nan por kompartí nan konosementu i eksperensia den práktika. Banda di esei e paisnan a palabrá ku nan ta bai traha huntu den e desaroyo mas aleu di kuido forénsiko di tantu adultonan komo menornan di edat den e parti Karibense di Reino. Minister Yeşilgöz-Zegerius ke pensa kon por sigui desaroyá esaki i ta ofresé sosten tambe.
Pa detektá krímen transnashonal interkambio lihé i seif di informashon entre e paisnan ta di gran importansia. E kolaborashon aki riba tereno di informashon ta duna un mihó bista di e relashonnan kriminal entre Karibe i Hulanda. Pa e optimalisashon di interkambio di informashon entre e paisnan, Hulanda a buta 2,5 mion florin na disposishon (pa tres aña). Ku esaki por fortalesé e liña di informashon den e paisnan i e kordinashon di informashon interinsular, por duna kursonan i ICT ta bira disponibel.
Finalmente, durante e JVO a papia tokante salbaguardiá e koperashon intensivo entre e kuerponan polisial den Reino. E agènda stratégiko ku e kuerponan a akordá ta trata entre otro edukashon, integridat, kordinashon di informashon i maneho, pero tambe kolaborashon den edukashon di funshonarionan di polis. E agènda tin benefisio pa tur pais. Pa e kolaborashon polisial regional aki tambe Hulanda strukturalmente lo buta medionan finansiero disponibel.
E siguiente JVO ta tuma lugá na yüni na Boneiru bou di presidensia di Hulanda.