Saba ta kuminsá ku skrinen di poblashon pa kanser na boka di matris
E skrinen di poblashon pa kanser na boka di matris na Saba ta kuminsá riba 7 di febrüari 2022. Saba Cares lo invitá hende muhé den e grupo di edat apropiá via di un yamada telefóniko pa e skrinen di poblashon (swab tèst). Esaki ta un skrinen importante pa prevení kanser na boka di matris. Partisipashon ta grátis i boluntario. Denter di 3 aña tur hende muhé di Saba entre 30 i 60 aña ta haña e oportunidat pa partisipá na e skrinen di poblashon aki kaminda e tèstnan, diagnóstiko i tratamentu ta integrá den un proseso sistemátiko i kontrolá. E aña aki, hende muhé di 50 pa 60 lo haña un promé invitashon.
Mihó salú
Hende muhé na Saba ya ta bastante konosí ku skrinen pa kanser na boka di matris. Sinembargo, te ainda no a integrá na un manera strukturá e diagnóstiko (di laboratorio) i e tratamentu den un proseso bon definí i kualitativamente sólido. Danki na e kolaborashon di RIVM ku Saba Cares, e skrinen pa kanser na boka di matris awor lo keda ankrá den un skrinen di poblashon. E aserkamentu struktural aki lo kontribuí na un mihó salú pa e poblashon di Saba.
Na nivel mundial kanser na boka di matris ta e di 4 kanser mas komun serka hende muhé. Danki na e skrinen di poblashon pa kanser na boka di matris pa medio di un PAP-test por detektá e komienso di kanser na boka di matris trempan. Mayoria bia por trata e komienso di kanser na boka di matris bon. Ku tratamentu na tempu por prevení kanser na boka di matris i hende muhé por tin un mihó kalidat di bida.
Paso importante
Na 2019 a ehekutá un pilot pa skrinen di kanser na pechu na Boneiru. Riba òrdu di Sekretario di Estado di e tempu ei Paul Blokhuis, na 2020 a buta e base pa e introdukshon di e skrinen di poblashon di kanser na Hulanda Karibense. Te ku awor kasi 600 hende muhé a partisipá den e skrinen di poblashon di kanser na pechu na Boneiru. Un paso importante den prevenshon; un gran parti di e siudadanonan no tabata konosí òf familiarisá ku e skrinen di poblashon. Den transkurso di e próksimo aña lo kuminsá ku skrinen di poblashon pa kanser na boka di matris na Sint Eustatius i Boneiru tambe.
Pa mas informashon: Cervical cancer screening on Saba | RIVM