Den 2021 kasi 60 porshento mas pasahero aéreo na Hulanda Karibense
Den 2021 mas di 290 mil pasahero a bula pa i for di e aeropuertonan di Boneiru, Sint Eustatius i Saba. Esei ta kasi 60 porshento mas ku den 2020, pero tabata tòg ainda 36 porshento ménos ku e mas di 457 mil pasaheronan den 2019. E kantidat di moveshonnan aéreo di i pa e tres aeropuertonan aki, ku 17,4 mil a surpasá e kantidat di buelonan den 2020 ku mas di 38 porshento, pero tabata tambe mas òf ménos un terser ménos ku den 2019. Esaki CBS ta informá basá riba sifranan nobo.
Den e di dos mitar di 2021 mas di 209 mil pasahero a bula pa Hulanda Karibense, 3 bia mas tantu ku den e di dos mitar di 2020 i 15 mil ménos ku den e di dos mitar di 2019. Desèmber ku kasi 40 mil pasahero aéreo, tabata e luna mas drùk den 2021.
Aeropuerto Boneiru di kuater di Hulanda
Flamingo Airport na Boneiru ta risibí kasi 90 porshento di e pasaheronan aéreo na Hulanda Karibense. Den 2021 kasi 260 mil pasahero a pasa via e terminalnan na Boneiru, 62 porshento mas ku den 2020. Respektivamente 15,2 mil i 15,3 mil pasahero a biaha via e aeropuertonan di Sint Eustatius i Saba, un oumento di respektivamente 15,6 porshento i 68,8 porshento. Mayoria transporte di pasahero a sosodé den e lunanan yüli te ku desèmber. Pa Boneiru esei tabata mas di 73 porshento di tur pasahero transportá, pa Sint Eustatius i Saba respektivamente 60 porshento i 66 porshento.
Tantu den 2020 komo den 2021 Flamingo Airport na Boneiru tabata e di kuater aeropuerto den transporte di pasahero di Hulanda, despues di Amsterdam Schiphol, Eindhoven Airport i Rotterdam The Hague Airport.
Mas ku mitar di moveshonnan aéreo ta pa Boneiru
Flamingo Airport na Boneiru tin mayoria moveshon aéreo di e tres aeropuertonan hulandes na otro banda di oséano. Den e periodo 2019 – 2021 mas òf ménos 60 porshento di tur buelo pa i for di Hulanda Karibense a bula via Boneiru. Di e sobra buelonan 24 porshento a bula pa i for di F.D. Roosevelt Airport na Sint Eustatius i kasi 16 procent pa Juancho E. Yrausquin Airport na Saba.
Mayoria buelo 2021 den segundo mitar
Na yüli 2020, na momentu ku no tabatin prohibishon di buelo pa Hulanda Karibense mas, e kantidat di buelo pa i for di Boneiru a oumentá. Desde ku a suavisá tambe e medidanan di corona pa tráfiko aéreo internashonal entrante 15 mei 2021, mayoria di e buelonan tabata bai Boneiru. Den e di dos mitar di 2021 tabatin mas di 6,4 mil buelo pa Boneiru, un subida di 80 porshento kompará ku e di dos mitar di 2020. E subida mas grandi (114 porshento) a tuma lugá na Saba, ku 1,9 mil buelo den e di dos mitar di 2021, mil mas ku un aña anterior.
Fuentenan:
StatLine - Caribisch Nederland; Luchtvaart, maandcijfers luchthavens (cbs.nl)