Gabinete ta redusí akseins riba gasolin pa Hulanda Karibense
Awe e gabinete ta anunsiá ku meskos ku na Hulanda, entrante promé di aprel lo redusí akseins riba gasolin temporalmente te fin di aña na Boneiru, Sint Eustatius i Saba. E medida aki ta forma parti di e pakete ku ta disponibel pa mitigá e efekto di subida di preis di energia na Hulanda Karibense.
Esaki ta nifiká ku te na final di e aña aki lo redusí e akseins riba gasolin na Hulanda Karibense ku 16 USD sèn pa liter. Riba disel ya no ta apliká akseins na Hulanda Karibense.
Entrante promé di aprel e akseins riba un liter di gasolin na Boneiru lo ta 16 USD sèn i na Sint Eustatius i Saba 8 USD sèn.
A base di e redukshon di akseins e entidatnan públiko na Boneiru, Sint Eustatius i Saba lo determiná e preis di gasolin di nobo i lo komuniká esaki.
Na total e gabinete ta buta 5 mion euro na disposishon di Hulanda Karibense. Di esaki 1,7 mion euro ta destiná pa medidanan fiskal, manera akseins; lo usa esaki pues pa temporalmente redusí e akseins riba gasolin.
E redukshon di akseins ta keda reglá den un desishon di maneho i despues mas pronto posibel lo presentá esaki via un lei di emergensia na Tweede Kamer, na mes momentu ku e lei pa redukshon di akseins pa gasolin i disel i e redukshon di BTW pa energia na Hulanda.