FIOD ta bishitá Boneiru
Riba 24 di mart un delegashon di FIOD a bishitá Boneiru. E delegashon tabata konsistí di: direktor general FIOD, Niels Obbink, direktor inteligensia i kolaborashon internashonal, Edo Edens, i lider di tim internashonal, Helma Citroen.
E delegashon a papia ku gezaghèber, Edison Rijna, direktor di Belasting Dienst Hulanda Karibense, Anneke van den Breemer, hefe suplente di kuerpo polisial, Ronald Zwarter, i algun kolega di KPCN.
Meta di e bishita aki tabata pa eksplorá e posibilidatnan pa reforsá KPCN i Belastingdienst CN den kombatimentu di labamentu di plaka i froude di impuesto, i pa traha na un manera mas intensivo ku otro.
Tur partido enbolbí ta di akuerdo ku un kolaborashon mas intensivo riba e tereno aki ta di gran importansia. Gezaghèber Edison Rijna: “Un bon supervishon ta importante pa kombatí práktikanan malu i pa kontinuá un klima di invershon sano”.
Ronald Zwarter a indiká: “Konosementu finansiero adishonal ta importante den kombatimentu di kriminalidat finansiero ekonómiko i den esaki nos partnernan ta bon biní.”
Na nòmber di FIOD, Niels Obbink ta duna di konosé: “Dor di uni forsa i huntu ku trahadónan di FIOD bira aktivo na Hulanda Karibense, nos ta fortifiká e konekshon den Reino. Pa medio di esaki, huntu ku tur nos partnernan, nos ta tuma akshon mas efektivo kontra froude fiskal i finansiero, i nos por kombatí minamentu.”