Minister Carola Schouten ta bishitá Hulanda Karibense

Vise minister-presidente i minister pa Maneho di Pobresa, Partisipashon i Penshun, Carola Schouten, lo hiba un bishita di trabou na Boneiru, Saba i Sint Eustatius for di 9 te ku 13 di mei.

Carola Schouten - Viceminister-president en minister voor Armoedebeleid, Participatie en Pensioenen

E bishita di minister Schouten – tambe responsabel pa Hulanda Karibense dentro di e Ministerio di Asuntu Sosial i Empleo - ta den kuadro di sera konosí ku e islanan i pa hiba kombersashon personal tokante di e desafionan riba tereno di desaroyo sosial ekonómiko eksistente. Durante di bishita e minister lo hasi esaki ku entre otro kolegio ehekutivo i miembronan di Konseho Insular di kada isla, representante di dunadó di trabou i trahadó, pero tambe ku abitante di e islanan.

Minister Schouten: “Tantu na Hulanda Oropeo komo Hulanda Karibense ta eksistí desafio grandi riba tereno di pobresa i partisipashon. Na esaki nos mester traha rápido pa bai dilanti e periodo binidero. Pa e motibu aki mi ta haña e bishita di gran importansia pa mi profundisá den e temanan en kestion riba e islanan. Nos mester wak konhuntamente kon tur hende por partisipá segun su propio kapasidat i kon pa konstruí un bon areglo di penshun di behes.”

E minister lo deliberá ku kua paso por realisá e punto di referensia pa mínimo sosial mas pronto posibel. E sosten pa e medidanan i ehekushon di e Akuerdo di Kralendijk lo bini eksplísitamente dilanti. Tambe e minister lo hiba kombersashon tokante akohida di mucha na Hulanda Karibense i sera konosí ku organisashonnan relevante den e gremio sosial i e organisashon di ehekushon di Ministerio di Asuntu Sosial i Empleo, Unidat SZW di RCN.