Diskurso Representante di Reino relashoná ku konmemorashon di defuntu Boneiru 4 di mei 2022
Dama- i kabayeronan, ta algu pekuliar ku despues di 2 aña di konmemorashon adaptá, nos por ta huntu ku otro atrobe pa hasi i eksperensiá esaki. E limitashonnan ku nos tur a eksperensiá den e periodo tras di lomba, (kasi) tur a disparsé.
Awe nos ta huntu akinan pa konmemorá e víktimanan di Segundo Guera Mundial i di otro konflikto- i operashonnan di pas.
Tur hende ku nos ta konmemorá awe tin un storia diferente, pero e libertat ku nan a pèrdè, ta loke ta uni nan ku otro.
Manera tur aña Komité Nashonal 4 i 5 di mei ta skohe un tema. Tur konmemorashon ku ta organisá den Reino, por uni su mes na esaki. Ku e tema e Komité kier relatá akontesimentunan históriko na e aktualidat rònt mundu.
E tema di e aña akí ta:
Libertat ku kompromiso.
E pandemia di corona i e limitashonnan ku esaki a bin kuné, a laga nos realisá kon importante ta pa ta den kontakto ku otro. Pa ta konektá ku otro. Pasobra ta solamente e kompromiso ku otro, a pone ku nos por a kombatí e krísis.
E eksperensia di libertat ku kompromiso ta haña un otro nifikashon den e tempu akí, den kua e guera na Ukrania tin atenshon di henter mundu. E sufrimentu humano ta grandi i ta duna nos un sentimentu di impotensia, pero tambe di kompromiso. Nos ta sinti un laso estrecho ku e personanan ku ta sufri bou di tur e violensianan di e guera sin sentido akí. Mundu tin bes ta skur i ta duna miedu i ta hustamente e ora ei nos tin nesesidat na konekshon ku otro. Un konekshon sin miedu òf temor, un laso den kua nos por laga nos bos resoná i ser tendé. Un konekshon den kua tin espasio pa diferensia, kaminda diversidat no ta un opstákulo, pero ta brinda ampliashon i konekshon. Kaminda no ta husga hende riba orígen, koló, religion, orientashon òf pa motibu di tin un opinion diferente, sino kaminda ta apresiá nan pasobra esaki ta hasi komunidat mas bunita. No laga odio goberná, sino amor, òf manera Mandela a bisa:
No one is born hating another person because of the colour of his skin, or his background or his religion. People learn to hate, and if they can learn to hate, they can be taught to love, for love comes more naturally to the human heart than its opposite.
Riba nos isla tambe nos ta mira ku diferensianan grandi i inakseptabel ta hasi e kontrastenan entre personanan mas fuerte. E yamada pa e manifestashon di mañan ta un ekspreshon di esei. Danki Dios ku riba nos islanan nos por ekspresá e sentimentunan di disgustu akí den libertat i e espasio ku ta kuadra ku esei. Ta algu ku nos no mester tuma nunka komo algu lógiko.
E aña akí lo ta karakterisá tambe pa elekshon di konseho insular den 2023. E lidernan polítiko lo mester por diferensiá di otro den libertat riba tur asuntu ku tin nan atenshon i di nos komunidat. Mi ta spera ku nan lo hasi esaki skèrpi basá riba kontenido di e diskushon, pero ku rèspèt korespondiente pa personanan ku tin un opinion diferente. Mi ta spera ku nan lo konektá e hendenan i lo sa di superá e kontrastenan. Esaki na interes di tur hende ku ta biba akí, irespekto nan opinion, koló, orígen, orientashon òf opinion polítiko, pero debí na e echo ku huntu nos ta responsabel pa esaki. Na final nos ta solidario ku otro, pa motibu ku nos ta residensiá, traha i biba ku otro aki riba nos isla presioso.
Kontrastenan semper lo tei, pero laga nos diskutí esakinan ku otro partikularmente debí na nos konekshon ku otro, di manera ku tin espasio pa buska solushon konhuntamente.
Konhuntamente nos ta konmemorá awe tur ku a duna nan bida den situashonnan di guera òf konflikto. Laga nos realisá nos mes ku nos mester sigui traha huntu pa logra pas i libertat pa tur hende. Laga nos tei pa otro. Hustamente den e tempu akí, kaminda nos ta realisá nos mes ku pas i libertat nunka ta lógiko. Laga nos konmemorá huntu i den kompromiso, kada ken ku su propio rekuerdo- i pensamentunan.