Minister Schouten ta invertí den tayernan sosial i servisio na Sint Eustatius
Minister Carola Schouten durante su bishita na Sint Eustatius ta primintí di bai traha strukturalmente riba mas oportunidat riba merkado laboral pa tur hende i pa fortalesé e servisionan relashoná ku pobresa i debe.
Atendé e problemátika di pobresa i redusí e distansia ku e merkado laboral, ta e dos tareanan prinsipal di minister Schouten. Durante su promé bishita na Sint Eustatius komo minister pa Maneho di Pobresa, Partisipashon i Penshun ya kaba e la tuma akshonnan mesora. Riba petishon di Komisario di Gobièrnu Alida Francis, e ta primintí di invertí èkstra den oportunidatnan pa trabou pa personanan ku ta distansiá for di e merkado laboral. Huntu ku e entidat públiko ta bai start un proyekto piloto pa habri un promé tayer sosial riba e isla.
Minister Schouten: “Ainda tin demasiado hende pará inhustamente na kantu pa motibu di un limitashon laboral, miéntras ku nan kier i por agregá balor grandi na e merkado laboral. P’esei nos ta bai usa e proyekto piloto pa duna oportunidat na personanan ku ta distansiá di e merkado labor pa partisipá sigun nan kapasidat.”
Fortifiká servisio
Durante e kombersashonnan ku Konseho Insular, e representante di e Diálogo Sentral Sint Eustatius i kombersashonnan ku habitantenan durante bishitanan na e akohida despues di skol i New Challenges Foundation, frekuentemente e problemátika di pobresa tabata tópiko di kombersashon. Minister Schouten ta tumando pasonan pa fortifiká e servisionan lokal den e sentido ei. Por ehèmpel ta bin un presupuesto pa trayektonan di formashon profeshonal pa dos kolaboradó di e entidat públiko pa duna guia profeshonal na personanan ku ta biba den pobresa. Tambe nan por traha riba prevenshon di debe.
E minister a ofresé tambe pa duna sosten èkstra kaminda esei ta nesesario na e Diálogo Sentral, den kua gobièrnu lokal i partnernan sosial ta uní. “E kantidat di personanan ku ta biba den pobresa ta sumamente haltu. Esei ta rekerí un aserkamentu sólido i mas ku tur konhunto. Ademas ta importante pa gobièrnu nashonal i lokal fortifiká otro. E deseonan pa esaki di parti di e Diálogo Sentral nos lo diskutí riba término kòrtiku.”
Mas lat e siman akí, despues di finalisá su bishita di trabou na Hulanda Karibense kompletu, minister Schouten lo anunsiá kua otro invershonnan lo bai hasi riba e islanan riba término kòrtiku.